Éxito rotundo na II Cea Gala do Comercio asociado

Na mesa da esquerda personalidades políticas como María Xosé Vega Buján e Raquel Arias. Na dereita, o alcalde de Monforte e os representantes do CCU contemplan un video dos homenaxeados. EC

O Centro Comercial Urbano de Monforte celebrou o pasado 3 de decembro a súa segunda Cea Gala do Comercio asociado, coa asistencia dun total de 217 persoas. A ausencia máis destacada a da Directora Xeral de Comercio da Xunta de Galicia, Nava Castro, que non puido chegar a tempo debido á folga de controladores. Pola súa parte, entre as autoridades, persoeiros políticos como o alcalde de Monforte, Severino Rodríguez, a vicepresidenta terceira da Deputación de Lugo, María Xosé Vega Buján, a delegada territorial da Xunta en Lugo, Raquel Arias e numerosos representantes da política local como os socialistas José Tomé e Jaime Vázquez, e o popular Manuel Eiriz.

A edición anterior, con 179 participantes xa supuxo todo un éxito que este ano foi ainda máis notable. I é que o salón comedor para os convidados quedouse pequeno para acoller a todos os asistentes.

Representantes da política local, nas fotografías superiores, estiveron atentos á emotiva entrega de premios dos homenaxeados, uns homenaxeados que recibiron unha particular peza de Gundivós e que na maior parte dos casos acudiron a recoller os seus agasallos moi emocionados e por suposto entre aplausos. EC

Homenaxe para os presentes e tamén para os ausentes

Este ano a cea de gala do Centro Comercial contou con seis homenaxeados. Dous deles, asociados e recén falecidos, foron Frank Mora González, de Fraymar e F&M, e Julio González Vázquez, de Queserías Prado. Pola súa parte, como socio fundador e tamén falecido, homenaxeouse a Jesús Castro Rodríguez, de Salón del Mueble Monforte.

Pero houbo tempo tamén para unha mención a tres socios xubilados. Estes foron Jesús Moure Cabo, de Panadería Moure, María Madriñán Rodríguez, de Farmacia Madriñan e Arcadio Vila Díaz, de Fotografía Arcadio. Todos eles, presentes e familiares de ausentes agradeceron o seu recoñecemento. Deste xeito, tras unhas palabras de benvida por parte de organizadores e políticos, deuse paso a unha serie de videos comentados moi emotivos nos que se foi resumindo a traxectoria vital dos que este ano non puideron acudir á cea.

A cea de gala contou con máis de 200 invitados entre autoridades, políticos, asociados e familiares. Todos eles escoiraron os numerosos discuros que pronunciaron, entre outros, a delegada territorial da Xunta en Lugo, Raquel Arias, o alcalde de Monforte, Severino Rodríguez e o xerente do Centro Comercial Urbano, Germán Vázquez. Sen embargo un dos momentos máis emotivos foi a homenaxe a un dos falecidos, cando a súa viuva acudiu a recoller o galardón. Pero ademáis de agasallos para os protagonistas da noite tamén houbo un pequeno detalle para todas as mulleres que asistiron á cea, unha cea que posteriormente transcorreu moi animada e que contou con dobre motivo de celebración xa que coincidiu co encendido do alumenado de Nadal no centro de Monforte. EC

Apoio dos comerciantes a este tipo de iniciativas

Dende o Centro Comercial Urbano quixeron destacar o apoio da xente e dos comerciantes da vila a todas estas iniciativas. En palabras dos organizadores, o que máis lles chamou a atención foi a unión dos comerciantes, así como a colaboración prestada por outras entidades. Entre estas, quixeron amosar un agradecemento especial a Adegas Algueira, Bazar Lago, Red Informática e Cadena Ser Tv7.

E como todo saiu a pedir de boca, dende o CCU xa están a traballar na organización da vindeira cea, ainda que antes tocará traballar nos mercados de Monforte, despois na campaña de rebaixas e posteriormente sobre a nova lei de comercio, aspecto sobre o que incidiron e co que o Centro Comercial se amosará moi estricto no seu cumplimento. A isto hai que engadir que durante o seu discurso, o xerente do CCU, Germán Vázquez, prantexou reivindicacións como a de que a Cámara de Comercio de Lugo non se preocupa pola zonz sur da provincia.

Asimesmo, Vázquez agradecu á Xunta de Galicia, á Deputación de Lugo e o Concello de Monforte a súa colaboración con este colectivo e insistiu no feito de traballar con independenciadas cores políticas.

Pola súa parte, Raquel Arias apostou polo pequeno comercio e de proximidade como un sector fundamental e lembrou que en breve será aprobada a nova lei de comercio, que ademais de favorecer estes obxectivos, renovará unha lei actual obsoleta. Mentras tanto, o alcalde de Monforte non escatimou en eloxios para o traballo dos comerciantes, e defendeu a seriedade coa que sempre se traballou dende o Centro Comercial Urbano, ao mesmo tempo que felicitou aos seus integrantes por traballar polos seus proxectos e as súas ideas. En palabras súas, definiu ao CCU como “un exemplo a seguir”.

Deixa unha resposta

Your email address will not be published.

Nova Anterior

UN BELÉN CON MOITA VIDA EN RIBAS DO SIL

Seguinte Nova

Alumeado exclusivo e polémica para as rúas de Monforte

Últimas noticias sobre PORTADA

A %d blogueros les gusta esto: