Certame “Vila de Quiroga»: O prazo para as cartas remata o 14 de febreiro

O Concello de Quiroga, dende a Oficina de Xuventude, organiza o VIII Certame de Cartas de Amor “Vila de Quiroga” 2011. Todas as persoas que desexen participar deberán escribir unha ou varias cartas que teñan por tema principal o sentimento do amor. A extensión máxima das cartas será de dous folios mecanografiados por unha soa cara e poderán estar en galego ou castelán. Pola súa parte, os datos do autor ou autora, así como a súa dirección e o seu teléfono, presentaranse dentro dun sobre pechado indicando o título da carta e a categoría na que participa no exterior do mesmo. As categorías son as seguintes: cartas non locais (remitidas por persoas non domiciliadas neste Concello), e os premios desta categoría serán tres placas conmemorativas e máis tres detalles; e cartas locais (para veciños do pobo de Quiroga), premiados cunha placa conmemorativa e un detalle para cada subcategoría de infantil (menores de 12 anos), xuvenil (de 13 a 18 anos), senior (de 19 a 35 anos), e dourada (de 35 anos en diante). Os traballos xa poden enviarse por correo, entregarse persoalmente na Oficina de Información Xuvenil ou na Casa de Cultura. A data límite é o 14 de febreiro. Aos gañadores comunicaráselles a data fixada polo Concello para a entrega dos premios e os seus traballos quedarán en propiedade para as publicacións de “Cartas de amor, Vila de Quiroga”.