A implantación dos colectores de lixo selectivo nas rúas de Monforte, vidro, envases, papel e pilas, avanza a bo ritmo tal e como indicou o concelleiro de Medio Ambiente, Antonino Luaces. Polo momento, os novos colectores están a situarse no casco urbán dende o pasado luns 31 de xaneiro, e máis adiante pasarán a colocarse no medio rural.
“O que se está a facer é cambiando todo o relativo ao lixo selectivo, son colectores específicos, e de momento estase a levar a cabo en todo o casco urbán. Nas parroquias tamén se vai facer, principalmente nas súas saídas e tamén nas saídas dos núcleos, onde se instalarán estas illas ecolóxicas. É preciso destacar que nas saídas dos núcleos, dependendo do grandes que sexan faranse illas ou non para que a xente cando saia das súas casas cara Monforte poida depositar o que é o vidro e demáis basura selectiva”, explicou Luaces.
O concelleiro de Medio Ambiente tamén apuntou que máis que unha cifra concreta o que están a facer é colocar segundo as necesidades que se detectan. “Por exemplo, no medio rural aínda temos que ver cantos sitios pode haber e como está a situación, mentras que noutros casos moitas veces necesitamos espazo, pero o que non podemos facer é implantar colectores e quitar prazas de aparcamento”, engadiu. A maiores de todo isto, o concelleiro tamén asegurou que unha vez posto en marcha o sistema de “cubeo”, polo que os colectores verdes serán retirados cada día, os 12 soterrados cos que conta Monforte pasarán a ser de lixo selectivo. O uso destes novos colectores será para todos os veciños, sen embargo, os comerciantes contarán con un específico. Deste xeito, “para eles, o que é a recollida de cartón faise todos os días polas mañás a unha hora determinada”.
En canto ao prazo de colocación, Luaces quixo deixar claro que non teñen unha data concreta. “Neste senso entran en xogo moitos factores, i é que nós imos implantando segundo a dispoñibilidade do persoal, porque o mesmo camión tamén se precisa para a retirada de poda de leña, para a retirada de colectores grandes, para vaciado dos colectores de vidro e outras tarefas, así que iremos avanzando segundo a dispoñibilidade da empresa”.
