Recentemente abriuse o prazo de solicitude do Plan de Comunidades Veciñais de 2011, mentres se acomenten en moitos casos as actuacións concedidas o pasado ano.
No municipio de Chantada aprobáronse en 2010 un total de 4 actuacións baixo esta figura. Os veciños aportan parte do finanzamento para o que o organismo provincial concede importantes porcentaxes baixo o réxime de concurrencia competitiva. Nunha tendencia clara de recuperación de espazos comúns na aldea, a meirande parte dos cartos do plan de comunidades destínanse a este fin. A segunda fase do arranxo do local social de Santa Uxía de Asma, cun investimento de 16.000 euros, 12.000 achegados polo plan; a instalación da cuberta no edificio social de Santa Cruz de Viana dadas as importantes condicións de deterioro da mesma, cun custe de 16.949, dos que o organismo provincial achega 12.000; ou o acondicionamento de espazos comúns exteriores destinados ao recreo dos máis pequenos, pero sobre todo á terceira idade, en San Fiz de Asma, mediante o investimento dalgo máis de 16.000 euros, dos que se subvencionaron 12.000, son un bo exemplo da radiografía xeral destas estratexias de cooperación. Resolver os accesos aos numerosos viñedos da zona é outra das importantes demandas que tivo cabida tamén mediante a cooperación veciñal, coa segunda fase dos accesos a unha zona das ribeiras de Pesqueiras, á que se destinan con cargo á anualidade 2010 un total de 15.000 euros, dos que 11.600 son a parte subvencionada.
