O Centro Cinexético volta a ser propiedade da Deputación
•Na quinta reunión do Padroado da Fundación do Centro Superior Cinexético e Piscícola de Galicia, celebrada fai unhas semanas e presidida polo presidente da Deputación de Lugo, José Ramón Gómez Besteiro, acordouse por unanimidade a liquidación económica desta entidade. Deste xeito, a titulariedade da propiedade de Tor pasará a corresponder ao organismo provincial. Con isto, Gómez Besteiro quixo destacar que “a Deputación de Lugo e a provincia recupera de novo para o seu patrimonio e para o de todos os lucenses a propiedade de Tor”. Agora, despois de enviar o acordo da liquidación á administración autonómica para que esta o ratifique, só queda agardar a que a Consellería de Medio Rural formalice unha resposta antes de tres meses. De non ser así, considerarase que a Consellería dá a razón á Deputación. Na reunión tamén estiveron presentes o Secretario Xeral Técnico da Consellería de Medio Rural, Jorge Atán; o Director Xeral de Conservación da Natureza e o Xefe Territorial autonómico, Ricardo García e Ramón Carballo; o Vicepresidente Primeiro da Deputación, Antón Bao; e os Deputados de Gandeiría e Urbanismo, José María Arias e Miguel Ángel Sotuela; e o Secretario da Fundación, Faustino Martínez.
Cargando ...
