A Casa da Cultura de San Clodio estará lista en breve

A Casa da Cultura de San Clodio, no concello de Ribas de Sil, será rematada grazas ao canon da Deputación de Lugo; así o afirmou o alcalde Miguel Sotuela. O edificio está situado ao lado da casa do Concello e foi construido durante os últimos anos co diñeiro procedente dun programa específico de colaboración acordado no seu día coa Xunta de Galicia. “É unha obra que vamos a facer con cargo ao canon da Deputación; pero por facer un pouco de historia, explicar que o proxecto este é un edificio que foi feito, o que é a estrutura e algúns detalles máis, grazas a un programa de colaboración entre a Xunta de Galicia do goberno bipartito e o Concello”, explicou Sotuela. Agora, os cartos que aporte a institución provincial permitirán preparar a instalación eléctrica e acondicionar o salón de actos, así como dotar ao edificio de parte do mobiliario. “Xa está case todo feito, o único que falta é rematar o interior, o que sería a luz, calefacción, ascensor e algúns mobles”, indicou o alcalde. “Digamos que quedará rematada en breve, ainda que falte algún detalle como por exemplo o baixo, sen acondicionar completamente. A Casa da Cultura contará así con salón de actos de ampla capacidade e tamén un amplo escenario, vestiarios, e outros espazos para varias necesidades e servizos do concello que poderían ser trasladados alí para aliviar certa carga no consistorio”, engadiu. Sotuela quixo apuntar que esta obra ven a completar as inversións que a Deputación vai facer con cargo ao canon eléctrico, e que se traducen en case 70.000 euros. “Teño que lembrar tamén no canon da Deputación un tractor co que xa estamos traballando, e un camión motobomba que me consta que nestes días se adxudica na Deputación”.

En canto a prazos de execución, dende o Concello agardan que as obras comecen canto antes e rematen tamén nun breve período de tempo. “Contamos que nun espazo moi breve de tempo se adxudiquen as obras e se poida comezar a traballar, e en relación a prazos de execución, non sei exactamente se son tres ou seis meses, pero de todas formas non creo que se alongue moito no tempo”, concluiu.

Outras actuacións

A mairores da Casa da Cultura, entre as vindeiras actuacións previstas no Concello de Ribas de Sil, o tenente alcalde, Roberto Castro, sinalou a recuperación dun sendeiro que vai dende a praia fluvial de San Clodio ata a zona coñecida como “o Barco”. “Empeza xusto no final da praia fluvial e remata na desembocadura do río de San Román; e o que se pretende facer alí é poñer en valor dita zona, crear un pouco de xardín, e poñer alumbrado para poder facer o percorrido polas noites”. O acondicionamento deste sendeiro, de aproximadamente 300 metros, está financiado cos fondos do GDR.

“Por outra parte, tamén temos un proxecto de recuperación de fontes, lavadoiros e espazos emblemáticos, que contempla varias actuacións en diversas aldeas do concello, para intentar recuperar eses espazos que foron parte do patrimonio etnográfico do municipio, e que a día de hoxe están en mal estado”, engadiu Castro. Algunhas das recuperacións contémplanse en lugares como Casares e Salcedo.

Xa por último, tamén cabe destacar a actuación nunha praza en San Pedro, “que consiste na recuperación dun espazo completamente abandonado no que se creará unha explanada con bancos, unha pequena fonte e un parque”; así como a construcción dun edificio destinado a aula de pesca, “un proxecto no que temos depositadas moitas esperanzas de futuro”, sinalou o tenente alcalde. “O que se faría sería un edificio de pranta baixa nas inmediacións da praia fluvial, cunha pequena inversión de 45.000 euros, e onde o obxectivo sería poñer en valor o río Sil coa instalación duns pequenos paneis que expliquen a vexetación, a flora e a fauna da ribeira do río Sil. Ao mesmo tempo, crearemos unha aula de pesca coa que tentaremos que excursións, sobre todo de cativos, podan vir aprender a pescar. Ademais, outra das finalidades sería a de fomentar a pesca respetuosa co medioambiente e concienciar sobre isto”. Para dito proxecto o Concello xa conta cunha subvención do Inludes.

Deixa unha resposta

Your email address will not be published.

Nova Anterior

Consellos e recursos para a transmisión familiar da lingua galega dende o primeiro momento

Seguinte Nova

Éxito no turismo sobre rodas

Últimas noticias sobre CULTURA

     
A %d blogueros les gusta esto: