Redacción-Chantada
O pasado 18 de marzo, o delegado de Cultura e Deportes da Deputación de Lugo, Antonio Veiga, realizou unha visita ao campo de fútbol chantadino de O Sangoñedo para comprobar os resultados das reformas levadas a cabo en ditas instalacións deportivas. Os traballos realizados no campo de fútbol consistiron na substitución da capa de caucho da superficie do terreo de xogo, de céspede artificial, e encargada de amortiguar e absorber os golpes, co fin de solucionar os problemas detectados na prática deportiva. Esta reforma contou coa financiación da Área de Deportes do organismo provincial, que destinou máis de 30.000 euros para este traballo, achega que foi calificada por Veiga na súa visita a Chantada como “unha clara aposta polo apoio aos concellos lucenses no mantemento das súas instalacións deportivas no mellor dos estados para favorecer a prática deportiva”, e que esta actitude foi “unha tónica constante durante toda a lexislatura”. Asimesmo, Veiga lembrou que a Área de Deportes da Deputación de Lugo tamén realizou unha achega económica para dotar ás bancadas do campo de O Sangoñedo de douscentos asentos de plástico con respaldo, colocados sobre a gradería de formigón.
Durante a súa visita, Antonio Veiga estivo acompañado polo tenente de Alcalde chantadino, Ildefonso Piñeiro, e polos concelleiros Olga Otero e Xesús Mazaira. Piñeiro agradeceu a colaboración da Área de Deportes da Deputación de Lugo, e lamentou que a aportación doutras administracións “como a Xunta de Galiza” sexa “praticamente nula”.
Veiga felicitou ao clube de fútbol de Chantada polos seus éxitos deportivos, e gabou o dinamismo asociativo da vila no eido deportivo.
