Formación e iniciativas en Monforte

Na súa visita a Monforte, Besteiro destacou a inversión de case 4 millóns de euros na cidade do Cabe en iniciativas para a creación e mellora de servizos, así como a xeración e mantemento de postos de traballo

O presidente da Deputación de Lugo no momento da súa chegada a Monforte. EC

Redacción-Monforte

O presidente da Deputación provincial, José Ramón Gómez Besteiro, achegouse ata Monforte fai uns días para, ademais de pechar mediante a sinatura de tres convenios con colectivos veciñais as novas actuacións que executará a institución neste municipio, manter un encontro cos doce traballadores da administración local que están a participar no curso Comunicación e Protocolo. Trátase da terceira edición desta xornada que organiza a Deputación na provincia, impartida polo xefe deste servizo no organismo provincial, Juan Carlos Pulpeiro. Dito curso xa se desenvolveu en Lugo e Viveiro. Agora, celébrase na cidade do Cabe co obxectivo de que o persoal da administración teña as mesmas oportunidades de participar nunha xornada moi demandada, centrada na correcta organización de actos institucionais. É ademais, un dos máis de 60 cursos que conforman o plan de formación da Deputación.

Activación do emprego a través do Km0, Lugo Emprega e a firma do convenio con Pacadar

Durante a súa visita, Besteiro tamén avanzou que o investimento da Deputación en Monforte acada xa os cinco millóns de euros. Unha serie de investimentos que “respostan ademais á creación de emprego neste municipio”. Deste xeito, cos máis de 200.000 euros do Lugo Emprega, o organismo provincial contratou a 30 persoas, mentres que cos cursos do Pacto Provincial polo Emprego que acolle a cidade do Cabe insertarase laboralmente a outras 40. A maiores, o programa de Empresa e Sucesión Familiar contribuíu ao mantemento de doce negocios monfortinos; e o Km0 ten como provedores hostaleiros e comerciantes da zona que reciben todas as semanas novos clientes.

Asimesmo, para a xeración e o mantemento de emprego en Monforte e comarca, dende a Deputación déuselle o impulso necesario a unha das operacións máis importantes para a creación de emprego, como foi a consecución da instalación da fábrica de Pacadar na cidade do Cabe. Isto suporá a creación de preto de 100 novos postos de traballo directos, e outros indirectos na provincia.

Durante a súa visita a Monforte, o presidente do organismo provincial tamén lembrou que “nun momento no que o sector da construción está a sufrir as consecuencias da crise, a aposta da Deputación pola obra pública foi esencial para manter e crear postos de traballo; de tal xeito que tan só en Monforte, o organismo provincial achegou outros 2 millóns de euros para o acondicionamento de máis de 70 kilómetros de estradas provinciais e municipais”.

Pacto polo Emprego

Ainda que xa comezara, nunha das súas visitas tamén foi Besteiro o encargado de inaugurar de forma oficial os cursos do Pacto Provincial polo Emprego que se están a desenvolver na cidade. O obxectivo deste Pacto é o de dar formación a máis de 500 desempregados da provincia naquelas materias que se supoñen contan con mellores perspectivas laborais. No caso da vila monfortina, o que está a impartirse trata sobre os servizos de restaurante, que contará con 620 horas de duración. Máis adiante tamén se levará a cabo outro de atención sociosanitaria en institucións, con preto de 500 horas de formación. Pola súa parte, en Chantada xa deu comezo tamén un curso de atención sociosanitaria a domicilio, dotado con 640 horas de formación. A modo xeral, dende que comezaran os distintos cursos na provincia xa son 287 persoas as que están a participar dende o 9 de marzo no programa que se está a desenvolver en distintas vilas lucenses.

Deixa unha resposta

Your email address will not be published.

Nova Anterior

Actualidade do porto seco de Monforte de Lemos

Seguinte Nova

Inundacións en Sarria

Últimas noticias sobre ECONOMÍA

A %d blogueros les gusta esto: