Exposición «Lois Pereiro. Camiño do Futuro Libremente»

Dende o 1 de abril pode visitarse na Casa da Cultura de Monforte a exposición Lois Pereiro. Camiño do Futuro Libremente. EC
Un momento da inauguración da exposición sobre o poeta monfortino homenaxeado este ano no Día das Letras Galegas, e que congregou a autoridades e a numeroso público. EC.

No ano no que se lle adica o Día das Letras Galegas ao poeta monfortino Lois Pereiro, o Concello de Monforte ten programadas unha serie de actividades para a súa celebración. Unha delas é a mostra que xa pode visitarse na Casa da Cultura durante todo este mes de abril e ata o vindeiro 31 de maio; e coa que se pretende dar a coñecer o lado máis persoal do poeta. Deste xeito, a relación do poeta coa cidade do Cabe é a principal protagonista desta exposición, que ante todo pretende ser interactiva. Tanto é así que se divide en varios espazos. Un deles é “O poeta en Monforte”, no que se recollen as imaxes que reflicten momentos da vida de Lois na súa cidade natal, e espazo no que tamén se pretende que os visitantes interactúen coas imaxes axudando a identificar ás persoas que aparecen nas fotografías a través de comentarios escritos en post-its. Noutro dos espazos, “Diapositivas”, atópase un proxector que amosa de xeito continuo imaxes da fotobiografía do poeta. Son preto de cen fotografías que fan un percorrido circular polas súas diferentes etapas vitais.

A exposición, interactiva, permite escribir unhas verbas que logo se poden pegar nos murais da mostra, tal como fixo o alcalde de Monforte. EC

Na sección “Obra literaria” inclúese un panel informativo sobre a produción literaria do poeta, xunto aos seus ex libris e unha instalación formada por unha selección de copias dos seus libros, poemas e artigos, pendurando do teito. Finalmente, en “Curtametraxe” reprodúcese a cinta Valle de lágrimas, do ano 1986 e na que aparece Lois Pereiro; mentres que en “Audio”, dous equipos de música permiten escoitar o último recital de Lois no café Moka de A Coruña, ademais dunha selección dos seus poemas musicados tales como “Outro poema de amor” de Manu Clavijo, “Contra a morte o amor que vai comigo” de Alexandro González, “Furia” de Nación Reixa, “Narcisismo” de Radio Océano, ou “Postpunkdeirada” de Fanny e Alexander.

A exposición divídese en varios espazos nos que podemos atopar diapositivas, obras literarias, e unha curtametraxe. EC

A mostra pode visitarse libremente de luns a domingo en horario de once da mañá a unha do mediodía, e de cinco da tarde a dez da noite. Asimesmo, tamén se realizan visitas guiadas, nas que para poder participar só é preciso chamar por teléfono ao número 982 404 404.

Deixa unha resposta

Your email address will not be published.

Nova Anterior

Todo listo en Sober para a XXXI Feira de Amandi

Seguinte Nova

Paz Padilla leerá o pregón da XXIX Feira do Viño de Quiroga e decidirá o modelo gañador do Concurso de Camisetas

Últimas noticias sobre CULTURA

A %d blogueros les gusta esto: