Os vindeiros 16 e 17 de abril terá lugar a trixésimo primeira edición da Feira do Viño de Amandi en Sober cun total de 22 colleiteiros, e na que se agarda a afluencia de miles de persoas. María del Carmen Agrelo, concelleira de Cultura, e José Gómez, alcalde de Sober, destacan por encima de todo o viño como o futuro do concello.
Que supón para Sober esta Feira do Viño?
MC: Os dous pensamos da mesma forma, que a Feira do Viño de Amandi para Sober supón un dos días máis importantes do ano, porque hoxe en día está considerada unha feira de Interese Turístico, con recoñecemento a nivel de Galicia totalmente logrado. Para Sober é moi importante porque somos todo o cañón do Sil, e un pouco o corazón da Ribeira Sacra. Ademais, en case todas as casas hai colleiteiros, todos teñen unha adega, ao igual que o alcalde e mais eu. Entón penso que o viño é un reclamo moi importante para todos os veciños pensando nun futuro económico co que toda a poboación se poida manter, seguir crecendo e dando a coñecer o noso produto. A nivel turístico é moi importante tamén porque o viño vai acompañado da paisaxe de Sober. Somos o corazón do cañón do Sil, temos os bancais nunha zona espectacular, e sobre todo hai que recoñecer o duro traballo dos adegueiros, porque é un viño moi logrado e o traballo é todo manual. Asimesmo, abarcamos todos os miradores do cañón, tamén temos o románico de Sober e os petroglifos. E xa a nivel cultural, destacar que ao igual que en cada casa temos un colleiteiro e unha viña, tamén temos un músico e un xarro da alfarería de Gundivós.
Que novidades teñen este ano?
MC: O programa é moi completo. Destacar que haberá autobuses o domingo pero este ano tamén o sábado a maiores. O pregoeiro será o humorista galego David Amor, e despois por suposto non faltará a música nin as catas. Máis ou menos estamos mantendo o que é a clásica Feira do Viño de Sober, porque o que pretendemos é exaltar o produto do viño. E como innovación, pois intentamos sempre cambiar os catadores e mellorar a feira cada ano a nivel de infraestruturas; todo pese a ser un concello pequeno e ter un presuposto pequeno, así que, dende aquí, grazas por todas as axudas tales como as da Xunta de Galicia, da Fundación Artesanía de Galicia e da Deputación de Lugo.
JG: Sexa como sexa hai que apoiar sempre aos adegueiros porque o noso futuro hoxe en Sober é o viño. Aquí hai 40 adegas declaradas, pero aparte, todo o mundo ten unha adega, e o que non fai viño para etiquetar vende as uvas ou vende o viño como pode, así que hoxe o futuro do concello é o viño.
Cantos adegueiros participan este ano?
MC: Son 22, dous máis que o ano pasado. E destacar tamén que en canto a afluencia de público, en anos anteriores falamos de miles de persoas, e temos claro que ano a ano medra por centos.
Un evento destas características dá moito traballo, pero a recompensa é maior, non?
MC: Sí, sen lugar a dúbidas, levamos case un mes tirándonos dos pelos porque os días deberían ter 30 horas en lugar de 24, así que por iso quero agradecer a todo o persoal do Concello que traballou duramente, e tamén aos adegueiros e a todos os que colaboran. Agora só desexamos que chegue o día, porque despois de haber traballado duramente sínteste orgulloso e só queres que todo saia ben e que a xente disfrute da Feira do Viño.
JG: É máis, temos que agradecerlle aos colleiteiros a boa elaboración que fan dos seus caldos, porque grazas a todo o seu traballo podemos presumir neste concello e en toda a Ribeira Sacra, que en viño tinto eu creo que temos, por non dicir o mellor, un dos mellores do mundo.
Cargando ...
