Chantada debate os orzamentos

No último pleno, no Concello de Chantada debatíronse entre outros aspectos, a aprobación dos orzamentos, cifrados en 5.600.000 euros. Xosé Manuel Ledo, concelleiro de Obras explicou que “é necesario dicir que baixaron considerablemente os impostos de licenzas de construción, e logo tamén a partida que ven da Xunta de Galicia, que se viu reducida nuns 400.000 euros. Realmente a única administración que mantén ou aumenta as súas inversións é a Deputación provincial”. De igual xeito, o concelleiro de obras quixo destacar o plan Lugo Emprega da Deputación, “xa que grazas a el, en Chantada reduciuse considerablemente o paro”. Por outro lado, no mesmo pleno o BNG presentou unha moción para que o Ministerio de Fomento inclúa entre as súas prioridades a reanudación das obras da autovía Lugo-Ourense, e conte co financiamento suficiente para rematalas. Finalmente, Ledo informou de que nos vindeiros días terán lugar unha serie de obras nas rúas da localidade. “Imos realizar o que é a sustitución do aglomerado na Rúa Nova debido a que o deixaron mal colocado, e tamén vamos actuar na marxe dereita da Avenida de Lugo, sustituíndo unha das beirarrúas e os sumidoiros”. Pero a maiores destas obras, no concello de Chantada tamén se estivo dotando de aglomerado en quente a dez quilómetros de vías da Deputación provincial. Por outra parte, Ledo tamén indicou que xa foi adxudicada a obra do novo auditorio. “Adxudicouse á empresa Framiñan de Lalín, por un importe de algo máis de 900.000 euros, e está previsto que as obras comecen dentro dunha semana aproximadametne”. O prazo de execución é de sete meses.