•Un programa permite aos lucenses maiores de 50 anos desfrutar de descontos nos balnearios da provincia • Trata de fomentar tratamentos saudables e o turismo de interior
Redacción – Monforte
O Presidente da Deputación de Lugo, José Ramón Gómez Besteiro; acompañado da Vicepresidenta Terceira, María Xosé Vega Buján; do membro do Consello Reitor do Inludes, Manuel Dacosta; e do Subdirector Xeral da cadena OCA Hoteles, Arturo Rodríguez; presentaron no balneario de Pantón o programa “Saúde e Benestar no Camiño de Santiago”. Trátase dunha iniciativa dirixida a veciños da provincia maiores de 50 anos, aos que se lles facilita o acceso aos tratamentos termais que ofrece a provincia, como unha alternativa de saúde que mellore a súa calidade de vida, potenciando ao mesmo tempo o turismo interior. Para isto, o organismo provincial subvenciona un total de 1.750 prazas nos catro balnearios lucenses situados en Pantón, Palas de Rei, Guitiriz e Lugo, así como nas 50 casas rurais máis próximas a estes establecementos, é dicir, as afincadas na Ulloa, Terras do Miño e Ribeira Sacra.
Con isto, tal e como salientou Gómez Besteiro, preténdese dar continuidade ao turimso de interior, xa que unha das principais conclusións ás que se chegou no Congreso de Turismo celebrado na Deputación, é que hai vida despois do Xacobeo; “por iso impulsamos unha iniciativa que aposta pola saúde e o benestar para reactivar a economía. Este programa está vinculado ao turismo, aos Camiños de Santiago que atravesan a provincia, e ao sector hoteleiro. En resumidas contas é unha alianza porque se ao sector privado lle vai ben, a nós tamén”.
Pola súa parte, o Subdirector Xeral da cadena OCA Hoteles, Arturo Rodríguez, quixo destacar que a iniciativa da Deputación “estimula o benestar social mediante os tratamentos termais e apoia as infraestruturas hoteleiras ao mesmo tempo que impulsa un sector como o turismo, que representa o 40% da riqueza do país”.
Descontos
O programa “Saúde e Benestar no Camiño de Santiago” ofrece, dende o vindeiro mes de agosto e ata decembro, descontos de 34 euros por persoa nos seguintes paquetes: 6 días con 5 noites de estancia; 5 pensións completas con comidas e ceas incluídas; día de entrada domingo: cea e aloxamento; día de saída venres: almorzo e xantar; 2 técnicas de balneario durante 4 días; 1 recoñecemento médico; e, de luns a xoves: programa de animación sociocultural. En canto ás 1.750 prazas do programa, estas distribuíronse en función das posibilidades expostas por cada centro e da seguinte maneira: Balneario de Lugo Termas Romanas, 50 prazas; Balneario Oca Río Pambre, 100 prazas; Guitiriz Hotel Balneario & Golf Club, 450 prazas; Oca Augas Santas Balneario Golf Resort, 750 prazas; e Casas de Turismo Rural na Ulloa, Terras do Miño e Ribeira Sacra, 400 prazas. Pola súa banda, será no mes de xuño cando o organismo provincial abra o prazo de solicitudes para que todos os interesados poidan solicitar unha destas prazas mediante a páxina web do organismo provincial (www.deputacionlugo.org), ou ben de forma presencial no rexistro do Pazo de San Marcos. A iniciativa conta cun orzamento de 60.000 euros.
