VIÑO E ROMÁNICO EN PANTÓN

En marcha xa as Xornadas do Románico, mentres as sete adegas se preparan para dar a coñecer os seus caldos

Redacción – Monforte

Flora Enríquez, José Luis Álvarez, Ramón Losada e José Manuel Ledo na presentación das Xornadas e a Mostra dos Viños. EC

Coa chegada do mes de xuño Pantón reclama o seu protagonismo cunha nova edición da Mostra dos Viños de Pantón e das xa institucionalizadas Xornadas da Rota do Románico. Estes dous eventos téñense feito inseparables nos últimos tempos nun afán de reforzar dous dos referentes máis importantes do municipio: a produción vitivinícola e o legado románico que coloca a Pantón como o buque insignia monumental desta arte na comarca de Lemos. Tanto a mostra dos viños coma as xornadas do románico foron presentadas en Ferreira. As segundas desenvolveranse entre o 27 de maio e o 2 de xullo aglutinando diversas iniciativas como a conferencia que porá en relación viño e románico achegándose ao viñedo nas terras de Pantón durante a Idade Media, a cargo do historiador Xosé Luis Sobrado. Outra charla terá lugar o 3 de xuño e versará sobre a ecoloxía dos ríos, un recurso vital neste municipio atravesado por Miño e Cabe. Finalmente, o 10 de xuño, Francisco Ruíz de Aldereguía analizará a pegada dos galegos e da Ribeira Sacra nas antípodas.

ACTIVIDADES COMPLEMENTARIAS NO CONTEXTO DO ROMÁNICO

Pero as charlas completaranse con outro tipo de actividades que enriquecen as xornadas de promoción do románico: a música, a fotografía e o sendeirismo están a ter presenza durante estes días na axenda a través do concerto no emblemático mosteiro das Bernardas a cargo do grupo de corda Ensemble Aurum que terá lugar o 29 de maio; a exposición que o fotógrafo chantadino Roi Fernández inaugurará o 3 de xuño no edificio sociocultural e que ten como base a paisaxe da Ribeira Sacra; e a rota de sendeirismo que pón o colofón á vixésimo cuarta edición das xornadas. Tal e como explicou a coordinadora deste programa, a investigadora Flora Enríquez, trátase dunha xornada de sendeirismo que se prepara para o 2 de xullo e que percorrerá un novo itinerario ao longo da Ribeira do Cabe. Enríquez puntualizou que “o espírito do románico non permanece nin remata nas Xornadas e nuns actos concretos”, senón que se prolonga durante o tempo con calquera visita e con todo o que reforza a relación entre os monumentos, o viño e incluso a literatura.

O MELLOR DA ÚLTIMA COLLEITA

A fin de semana do 4 e 5 de xuño sete adegas do municipio amosarán os resultados da última colleita na mostra dos viños que acada a súa décimo oitava edición. O representante dos adegueiros de Pantón, Ramón Losada, destacou a boa nova que supuxo a recente ampliación das zonas de produción amparadas polo Consello Regulador no municipio, unha vella demanda á que se lle deu cumprimento en boa parte “grazas ao apoio do Concello”. Losada tamén destacou a unión entre arte e viño nunha estratexia que contribúe a afianzar as visitas turísticas e o consumo da produción vitivinícola, “cada vez máis coñecida no mundo” e que este ano conta en Pantón cunha produción dunhas 200.000 botellas. Losada destacou que os produtores están dalgunha maneira devolvendo agora o que se ten feito por eles coa mostra e coas xornadas do románico, xa plenamente consolidadas. O rexedor local, Jose Luis Álvarez, foi o encargado de expoñer o amplo programa da mostra, que este ano seguirá un esquema similar ao de anteriores edicións contando con animación musical polas rúas, actuación de títeres, orquestras e presenza de coñecidos persoeiros para o pregón, como neste caso será o humorista Moncho Borrajo. O escenario para a amosar os caldos será novamente o do Castro de Ferreira, que este ano está de estrea ao ser recentemente acondicionado. Este espazo será inaugurado o domingo polo Conselleiro de Medio Ambiente, Agustín Hernández. Pola súa banda, o edil e ex alcalde José Manuel Ledo fixo referencia a todo o que se ten feito pola recuperación do patrimonio románico de Pantón dende 1987 cando se impulsaron as primeiras xornadas.

Deixa unha resposta

Your email address will not be published.

Nova Anterior

Unha ruta turística cinematográfica, baseada na produción «Romasanta», deu a coñecer as terras de Sarria e O Courel

Seguinte Nova

Monforte acogerá una jornada sobre seguridad y salud en el trabajo, organizada por la CEL

Últimas noticias sobre CULTURA

     
A %d blogueros les gusta esto: