Comezan de novo as obras na residencia de Bóveda

A súa ubicación suscitou críticas entre o colectivo de discapacitados

Redacción-Monforte

Fachada principal da que será a futura residencia de Bóveda.

A empresa Atención Integral Personalizada (AIP) comezou de novo fai uns días as obras da futura residencia para persoas discapacitadas de Bóveda. O alcalde, José Manuel Arias, explicou que os traballadores “xa levan varias semanas realizando distintas tarefas, tales como sacar anacos de cemento, retirar paneis, sacando terra e aportándoa onde fai falla, así como pequenas reformas interiores”. En xeral estase a facer o acondicionamento das zonas de xardín que rodean as instalacións, e tamén o derribo dalgunhas división interiores para distribuir os espazos de forma axeitada. No edificio tamén está previsto que se integren as enerxías renovables. Pola súa parte, a residencia suporá a creación duns oitenta postos de traballo directos e contará con 116 prazas e outras trinta no centro de día que tamén formará parte das instalacións. A finalización das obras está prevista para finais deste ano, ainda que tamén cabe a posibilidade de que se prolonguen ata o primeiro trimestre do 2012. O custe do proxecto é duns 16 millóns de euros.

Julio Cortiñas, presidente de Fademga Feaps Galicia. EC

Algunhas críticas

A residencia para discapacitados prevista no concello de Bóveda suscitou certa polémica debido á súa ubicación no polígono industrial. Así, o presidente da Federación de asociacións de Persoas con discapacidade intelectual (Fademga Feaps Galicia), Julio César Cortiñas, manifestou no seu día a oposición deste colectivo de persoas ao cambio de uso desta infraestrutura. “Construíuse inicialmente para atender a persoas da terceira idade, sen embargo, debido á falla de usuarios este centro destinouse agora á atención de persoas con discapacidade intelectual, despois de que unha empresa con ánimo de lucro negociase apoios coa Xunta, co fin de poder atender a persoas gravemente afectadas”, sinalou Julio Cortiñas. Asimesmo, o presidente de Fademga Feaps Galicia explicou que dada a súa ubicación e magnitude, a residencia “contravén os principios básicos da inclusión das persoas con discapacidade intelectual, motivo polo que o colectivo manifestou a súa máis firme oposición a esta macroresidencia, solicitando ao presidente da Xunta a súa intervención neste senso”.

Deixa unha resposta

Your email address will not be published.

Nova Anterior

Iniciado o proceso de contratación da residencia de Ribas de Sil

Seguinte Nova

Axudas de Medio Rural á gandeiría

Últimas noticias sobre INFRAESTRUCTURAS

     
A %d blogueros les gusta esto: