Redacción- Monforte
O Concello de Monforte continúa a celebrar numerosos actos na honra do poeta Lois Pereiro, escritor local ao que se lle adicou o Día das Letras Galegas este ano. Así, o pasado 30 de maio tivo lugar na Casa da Cultura, a presentación do libro A palabra exacta. Biografía de Lois Pereiro, libro do que é autor o tamén monfortino Antón Lopo.
Testemuñas dos máis íntimos do escritor
A obra supón un achegamento ao escritor a través das persoas que máis íntima relación tiveron con el, pero tamén a través das voces que se enfrontaron á análise da súa poesía ou que, dalgún xeito, o reivindicaron. Durante a súa presentación, Antón Lopo estivo acompañado pola concelleira de Cultura en funcións, Alicia Cadarso, e polo director da editorial Galaxia, Víctor Freixanes.
Asimesmo, o pasado venres 3 de xuño, tamén na Casa da Cultura, tivo lugar a proxección do documental Lois Pereiro, Seguindo os Surcos. Un documental duns oitenta minutos, con guión e dirección de Gonzalo Enríquez Veloso, e baseado na vida e obra do poeta monfortino. Nel, aparecen familiares e amigos, así como numerosos compañeiros e figuras pertencentes ao campo da literatura e a arte; en total, preto dunhas corenta persoas. Segundo indicou o director, “o documental pretende sobre todo abordar a figura do poeta dende o punto de vista máis persoal, e ao mesmo tempo facer un ensaio audiovisual sobre a poesía”. Despois de Monforte, a idea é proxectar o documental por distintas cidades, festivais e tamén en centros galegos doutros países para que “teña a maior difusión posible”. Unha obra que está financiada pola Deputación de Lugo. Aproveitando a ocasión, trala proxección procedeuse á clausura da exposición instalada na Casa da Cultura hai xa varios meses. Unha exposición que segundo indicou Alicia Cadarso, “é xa a máis visitada de todas as organizadas polo Concello de Monforte”.
