Unha viaxe no tempo desde Sarria pola historia das catro rodas

Gerardo García amósanos a súa colección de motos e coches antigos en aluguer dende a parroquia de Chorente (Sarria)

Gerardo García posa co seu Ford A Roadster chegado de Arxentina. EC

L.Gallardo – Sarria

Vinculado a unha antiga construción que foi no seu tempo casa de curas do 1700 na parroquia sarriana de Chorente, en Oural, está o que é un auténtico museo de coches históricos de Gerardo García. Este veciño adoptivo de Sarria é un namorado destas xoias dende os 17 anos, unha afección que foi mantendo ata o día de hoxe, no que conseguiu acondicionar unha enorme palleira para a exposición dos seus vehículos, unha colección de 14 pezas entre as que encaixan motos e turismos.

MIMO E GUSTO POLOS VEHÍCULOS, AS CLAVES DESTA SINGULAR COLECCIÓN

Aínda que non se dedica profesionalmente a isto, Gerardo García investiu moito tempo e diñeiro en adquirir estes e moitos outros medios para restauralos persoalmente con todo detalle. Moitos dos coches que tivo foinos vendendo despois de acondicionalos, durante o seu tempo libre, en Guísamo, de onde é natural. Actualmente deulle unha pequena volta á súa paixón, converténdoa tamén en negocio co aluguer destes vehículos para diferentes eventos, fundamentalmente vodas.

Un Chevrolet Capitol da colección de Gerardo García. EC.

A formación de Gerardo García en mecánica e en oficios para a restauración destas pezas é completamente autodidacta e, tal e como indica, “ten que gustarche, e na miña casa de pequeno sempre había transportes e a empresa familiar obrigaba a facer algúns traballos de cambios de motores e cousas polo estilo”. Lembra cando moitos non lle daban valor a estas pezas, e con tal motivo tivo que desfacerse de moitas delas. A cousa cambiou unha vez casado, cando empezou a dar renda solta ao seu quefacer e a súa colección foi en aumento. Os vehículos son verdadeiramente variados en funcionalidades e épocas. Chama a atención cando entramos en tan especial garaxe unha furgoneta Chevrolet de Gaseosas La Victoria que data de 1927. O traballo feito nela é completo, porque cando foi adquirida estaba completamente en ruinas. Despois, a carpinteiría con madeira de castiñeiro, a pintura, a tapicería e a mecánica imprimida por García, fixeron deste auto unha peza única. E trátase dun elemento irrepetible, xa que era un vehículo que viña de serie sen a carrocería, que se deseñaba ao gusto de cada un, e iso foi o que fixo novamente este afeccionado.

BÚSQUEDA POR TODO O MUNDO

O propietario coñece moito da historia de cada un dos seus coches e motos, tal é o caso do MGA-1600 ou do Renault Floride que conseguiu en Bóveda e que ten para uso persoal, ou a Derbi Scooter masculino que data do ano 52 e que utilizaban habitualmente os sacerdotes, coma neste caso o facía un cura da zona de Oural. Outras pezas viñeron dende moito máis lonxe, como o Ford A Roadster do ano 1928 que foi adquirido en Quilmes, Arxentina, non sen dificultades no proceso de compra e ata a súa chegada ao porto de Vigo, pero que hoxe configura unha das pezas máis chamativas restaurado ao milímetro. Por outro lado, chama a atención o que o propio Gerardo bautizou coma “o coche de Al Capone”, ao tratarse dun Studebaker President (Made In USA) de 1929, un 8 cilindros que aínda hoxe acada importantes velocidades, e detrás do que estivo 6 anos para mercalo finalmente en Francia. Quizáis sexa este o o vehículo estrela da colección: García non ten coñecemento de ningún igual en todo o territorio español. Restaurado coma os orixinais, esta ardua tarefa require ademáis de moito interese, unha grande dose de documentación coa que tamén conta este apaixoado do coche histórico.

Studebaker President made in USA, bautizado por Gerardo García como "o coche de Al Capone". EC

Nestes días, o coleccionista ocúpase da recuperación dun novo vello vehículo de luxo, un Oldsmobile do ano 1934, do que tamén destaca a cilindrada e a amplitude. Cada milímetro da restauración é obra del mesmo, salvo nos casos nos que se precisa aplicar pintura ao forno, ou determinadas tarefas de tapicería.

Un Oldsmobile do 1934, en fase de restauración polo propio Gerardo García. EC

As motos ocupan a parte superior deste museo, entre elas figuran moitas curiosidades e modelos coma a BMW R2 do ano 1933, ou unha Royal Enfield 500 Twing do 52. Este conxunto de vehículos, en perfecto estado e a punto para o seu uso, implica unha ardua historia de esforzos e investimento á hora de procurar cada peza orixinal, un factor no que é imprescindible a busca de contactos a través de Internet. Todo este traballo vese recompensado polos numerosos premios adquiridos en diversas concentracións, e pretende verse amortizado dalgunha maneira coa actividade do alugueiro.•

Deixa unha resposta

Your email address will not be published.

Nova Anterior

Primeiro Open de golf Ribeira Sacra

Seguinte Nova

Campionato galego de Pitch and Putt en Monforte

Últimas noticias sobre CULTURA

     
A %d blogueros les gusta esto: