«Viticultura heroica»: promoción e identidade para a Ribeira Sacra

Renome e maior prestixio para os viños de Pantón

O turismo e a Viticultura Heroica camiñan xuntos grazas á iniciativa do tren turístico Aba Sacra

Redacción-Monforte

Presentación do tren turístico que percorrerá a Ribeira Sacra (foto: Santos).

Seguindo a liña da Viticultura Heroica, entre as zonas características deste tipo de viticultura atópase o concello de Pantón; que tamén conta ademais, e dende fai anos, cunha consolidada Feira do Viño. Cómpre lembrar que a Consellería de Medio Rural caracterizou case 6.000 hectáreas vitícolas localizadas en zona de montaña, o que supón un 17% sobre o viñedo total galego. E dentro dese tanto por cento dúas das áreas vitícolas máis coñecidas pola súa fermosura paisaxística son as localizadas nos canóns dos ríos Miño e Sil, pertencentes ás denominacións de orixe Ribeira Sacra e Valdeorras.

“PARTIR DUNHA MARCA COLECTIVA AXUDARÁ AO PRESTIXIO DO NOSO VIÑO”, SEGÚN JOSÉ LUIS ÁLVAREZ

Para o alcalde de Pantón, José Luis Álvarez, a marca colectiva Viticultura Heroica que distingue a produción de viño nas zonas de montaña e forte pendente supón “a conxugación de toda unha serie de factores moi importantes e positivos que servirán para destacar aínda máis dentro do sector”. A día de hoxe, o concello de Pantón conta con sete adegas incluídas na Denominación de Orixe. “Para todas elas esperemos que esta marca supoña un impulso moi claro, xa que todo o que se faga en beneficio dun sector tan importante para Pantón como é o da viticultura, será ben recibido”, engadiu. Asimesmo, con vistas á Feira do Viño de Pantón, José Luis Álvarez sinalou que “aínda que un viño conte con certo renome, partir dunha marca colectiva axudará a coller máis prestixio”.

“RECOÑECEMENTO AO TRABALLO, E Á UVA MENCIA E GODELLO”, JUAN VÁZQUEZ, DE CASA MOREIRAS

En Pantón son varias as adegas que a día de hoxe seguen pelexando por entrar na Denominación de Orixe. Pero unha das que xa forma parte da Denominación dende o ano 1996 é a adega Casa Moreiras, con Juan Vázquez Prieto ao frente. Para este adegueiro, pertencer á marca colectiva Viticultura Heroica supón “un recoñecemento á imaxe da Ribeira Sacra, pero tamén ao que é a uva mencía e godello”. “Tal e como o seu propio nome indica, trátase dun recoñecemento a este tipo de viticultura realizada en bancais e tan dificultosa. É unha viticultura complicada, aínda que hoxe xa contamos con grandes avances como poden ser os carrís, pero queda moito por facer, como por exemplo adecentar camiños e vías de comunicación”. Na opinión de Vázquez, a marca colectiva Viticultura Heroica “dará a coñecer o traballo que se está facendo, e servirá ao mesmo tempo para valorar aínda máis os viños da Ribeira Sacra”. Finalmente, en relación á Feira do Viño, Vázquez Prieto destacou que con isto Pantón dará unha imaxe de produto moi coidado dende a propia orixe da viña.

VITICULTURA HEROICA E TURISMO: TREN ABA SACRA

O tren Aba Sacra durante o seu percorrido (foto: Santos).

O tren turístico Aba Sacra é un bo exemplo de como conxugar estes dous ámbitos, e máis cando se trata de percorrer paisaxes tan espectaculares como as da Viticultura Heroica. Deste xeito, as abas (ladeiras) de Doade e Amandi, no concello de Sober, contan dende o pasado 17 de xuño cun innovador proxecto turístico que está a desenvolverse polas paisaxes dos Canóns do Sil. Segundo explicou o hostaleiro e promotor do proxecto, Antonio Rodríguez Álvarez, “trátase dun tren turístico, tipo Tschu-Tschu, sobre rodas neumáticas composto por unha máquina tractora que evoca as locomotoras Mikado que Renfe empregaba alá pola década dos anos 50-60 do século pasado, e tres vagóns panorámicos cunha capacidade para 66 viaxeiros”. O proxecto en sí xestouse fai un ano cando a empresa Iberdrola vaciou o río Sil, o que supuxo un importante descenso de visitantes a este singular anaco de Galicia. “A partir dese momento pensamos en alternativas que puideran atraer aos turistas, pero sempre nacidas da iniciativa privada, que é a que xera riqueza e postos de traballo”, engadiu Antonio. En canto ao proxecto en sí, a empresa titular do tren pretende ofertar viaxes ao “homo viator”; ao estilo do século XIX, ofrecendo unha viaxe para o coñecemento do entorno e, ao mesmo tempo, experiencias sensibles aos sentidos. “Non se trata de transportar viaxeiros, senón de mostrarlle a experiencia da viticultura heroica, a rudeza dos traballos e o encanto da paisaxe humanizada”. En canto ás rutas, o tren Aba Sacra realizará tres: a Ruta do Viño, tamén chamada Ruta Heroica, na que saíndo de diante da Cantina de Doade (Sober), o tren atravesará os bancais de Doade e Amandi; a Ruta do Románico, na que se visitarán as principais mostras do románico rural da provincia de Lugo; e a Ruta dos Miradores, na que o tren percorrerá os Balcóns Naturais do Cañón do Sil. A maiores, en todas as rutas haberá tempo para unha degustación de viño de Amandi e rosca de Sober. En relación aos horarios, de momento o tren realizará dúas viaxes, unha pola mañá e outra pola tarde, cun prezo de pasaxe de 14 euros. As reservas poden realizarse a través da páxina web: www.avistasacra.com, chamando aos teléfonos: 982 18 26 19 / 650 770 179, ou no Restaurante a Cantina de Doade.

Deixa unha resposta

Your email address will not be published.

Nova Anterior

Viticultura Heroica: a marca do futuro para o viño da Ribeira Sacra

Seguinte Nova

O Lemos aposta polo futuro: balance do estreno das categorías infantís

Últimas noticias sobre ASOCIACIONISMO

   
A %d blogueros les gusta esto: