Como reducir os danos por fauna salvaxe nas viñas

A Deputación prevé estender a experiencia ás localidades da Ribeira Sacra nas que o xabarín tamén destroza viñedos

Redacción-Monforte

A Deputación de Lugo continúa a desenvolver a experiencia pioneira en Galicia para diminuír os danos producidos por fauna salvaxe na agricultura, que levou a cabo no municipio da Fonsagrada no ano 2009. Dado o éxito acadado e os beneficios obtidos, o organismo provincial decidiu estender a iniciativa aos Concellos de Castroverde, Baleira, Becerreá e Navia de Suarna, nos que a afluencia de animais é maior que noutros municipios, causando danos moi cuantiosos aos agricultores da zona. Pero os técnicos provinciais están a estudar tamén a posibilidade de aplicar este sistema nas localidades da Ribeira Sacra nas que os animais causan importantes danos na cepa das vides. Concretamente, o TECOR de Quiroga xa solicitou a colaboración do INLUDES para paliar esta lacra que cada vez máis está a afectar aos produtores de viño da zona sur da provincia, o que lles provoca perdas económicas cuantiosas, tal e como indicou a Federación de Caza de Lugo. Así por exemplo, Juan Mateo, presidente do coto de Montefurado (Quiroga), explicou que dende este TECOR xa teñen solicitada a axuda ao organismo provincial. “Nós solicitamos para facer sementeiras, para que os xabaríns deixen as viñas e as hortas nas que fan destrozos e se centren un pouco nos sitios onde sementamos o trigo; e tamén desbroces para os corzos, coellos, perdices e toda a fauna en xeral”.

Un agricultor acondicionando o terro para a fauna salvaxe. DL

Mateo tamén explicou que os danos soen ser múltiples, “nestes momentos ainda non é moito, pero en canto as uvas comecen a coller un pouco de cor iso é un desastre, non hai viña que non sexa paseada todas as noites, hai que telas cerradas, con alambrada, e ainda así levantan a alambrada, van ás hortas, arrancan as patacas, os pementos, un desastre nos prados e en todos os lados, aínda que a nós aféctanos principalmente ás viñas e ás hortas”. Pola súa parte, o animal que provoca máis danos soe ser o xabarín, posto que arranca as viñas, mórdeas e tamén as tira. “O valor dos danos que producen é incalculable, porque hai viñas das que ao remate da temporada non podemos recoller nada, e todo o mundo protesta; pedimos batidas, pero aínda así non se fai nada. A ver se agora, tendo aos animais entretidos en algo que lles guste, con sembrados específicos para eles, no monte comunal e o máis alonxado posible das viñas, deixan de provocar tantos danos”.

No caso da Fonsagrada, a solución adoptada consistiu precisamente en iso, en sementar con diferentes tipos de millo e trigo varias parcelas, de tal xeito que a súa aplicación favoreceu a apetencia do xabarín, evitando que actuara nas fincas de particulares e nas vías de circulación. En España tan só contan cunha iniciativa semellante tres provincias, que son as de Toledo, Soria e Zamora.

Outros servizos

Actuación dos bombeiros de Vilalba durante un accidente. DL

Noutro orden de actuacións, a Deputación provincial ven de facer balance do servizo prestado polos parques de bombeiros da zona norte. Concretamente, os parques de bombeiros de Barreiros, Viveiro e Vilalba, que atenderon un total de 20 emerxencias acontecidas en once concellos da zona norte da provincia durante o pasado mes. Son datos que reflicte o primeiro informe de actuación de ditas instalacións contraincendios, logo de que o Consorcio Provincial de Bombeiros lograse a súa posta en marcha o pasado 1 de maio. Os 66 profesionais interviron así nos seguintes municipios: Barreiros (1), Foz (4), Burela (2), Mondoñedo (1), Alfoz (2), Riotorto (1), Vilalba (1), Abadín (2), Xermade (2), Viveiro (3) e Cervo (1). Das 20 intervencións realizadas, 10 foron extincións de incendios en vivendas, locais, vehículos ou servizos municipais, 3 excarcelacións, 2 rescate de persoas, e as restantes corresponderon a actividades de prevención tales como limpeza de estradas ou a actuacións debido a inundacións. O informe de actuación tamén reflexa que o tempo de resposta medio por emerxencia foi de 8 minutos, mentres que os de intervención e ocupación foron de 3 horas. Ademais, os 12 vehículos adquiridos polo Consorcio (4 por instalación) realizaron un total de 1.464 quilómetros. Os parques de bombeiros de Barreiros, Viveiro e Vilalba prestan servizo as 24 horas dos 365 días do ano, e dan cobertura ao 100% da zona norte da provincia, atendendo así a 25 concellos.

Deixa unha resposta

Your email address will not be published.

Nova Anterior

A subzona de Chantada será unha das beneficiadas pola promoción resultante da marca Viticultura Heroica

Seguinte Nova

Axudas de Medio Rural para fomento da 1ª forestación de terras non agrícolas

Últimas noticias sobre ECONOMÍA

     
A %d blogueros les gusta esto: