Arranca o Concurso de Tapas en Chantada, mentres os clientes do comercio teñen premios

Redacción -Chantada

A asociación de comerciantes de Chantada ten xa en marcha a súa campaña de verán como unha estratexia máis de promoción do sector. O sorteo dun vale semanal por valor de cen euros entre os clientes que merquen nos establecementos asociados durará ata as festas patronais. A pesares de que a conxuntura económica parece afectar tamén ás axudas que reciben este tipo de colectivos para manter o nivel de actividade que ven sendo habitual, segundo declarou o presidente dos comerciantes chantadinos, José Manuel Lage, “hai certas campañas moi exitosas que sí se deben manter para favorecer o consumo local”.

«MELLOR TAPA DIXITAL», E «PEQUECHEF», AS NOVIDADES DO CONCURSO DE TAPAS

Pero, tal e como se veu facendo nos dous últimos anos, o CCA de Chantada promove tamén o Concurso de Tapas encamiñado a dinamizar a actividade hostaleira. Dará comezo este sábado, 2 de xullo, e participarán unha docena de establecementos da vila. Haberá ademáis novidades, xa que será un xurado especializado, no canto do xurado popular, quen decida cal é a mellor tapa tradicional e a mellor tapa innovadora. Sen embargo, ademáis dos hostaleiros, a clientela recibirá premios por cada seis tapas consumidas dentro do concurso. Nesta ocasión creouse como novidade a categoría de “mellor tapa dixital”, que se votará a través de Facebook, e tamén o “Pequechef”, unha actividade para que os máis pequenos aprendan a cociñar unha tapa sinxela. O concurso de tapas desenvolverase de xoves a domingo durante todo xullo.