Presentación do libro “Os últimos brindeiros de Forgas”

O pasado luns día 6 de xuño, o salón de plenos do Concello de A Pobra do Brollón acolleu a presentación do libro Os últimos brindeiros de Forgas, escrito por Xosé Luis Foxo Ribas, en homenaxe aos Irmáns Álvaro e José Veloso Valcárcel, e ao seu traballo realizado nos cantares das vodas. Os irmáns Veloso foron dous cantores populares da aldea de Forgas de Abaixo que mantiveron viva ata o día de hoxe a vella tradición dos brindos ou cantares improvisados, tamén frecuentes noutros lugares como Quiroga, O Incio ou O Cebreiro. Á presentación do libro acudiron, entre outros, José Veloso (o seu irmán Álvaro faleceu o pasado mes de novembro), e Amparo Parada Aira, antiga pandeireteira e tamborileira que participou no traballo de documentación sobre as tradicións musicais, así como Anxo Lorenzo, secretario xeral de Política Lingüística da Xunta.