A folga será desconvocada o luns 18 trala firma do convenio

Redacción-Monforte

Trala decisión dos traballadores da empresa do servizo de limpeza de Monforte de iniciar unha folga indefinida a partir do vindeiro 1 de agosto, debido a que a propia empresa rompeu o acordo de mellora das súas condicións hai uns días, FCC rectificou este mércores e acordou cos traballadores e co sindicato UXT manter o convenio inicial tal e como quedara establecido nun primeiro momento. Deste xeito, despois da última asamblea mantida o xoves, Mario Docasar, representante sindical da UXT, anunciou que se manterán as condicións esixidas ao principio, respetando as vacacións tal e como estaban, a subida salarial e unha lixeira mellora en relación ao vestiario dos traballadores. Ao chegar a este acordo, o seguinte paso será agora a firma do convenio o vindeiro luns día 18 de xullo ás dúas do mediodía, momento no que se desconvocará a folga. “Unha vez teñamos firmado o convenio tal e como nós mesmos esiximos, e teñamos tamén unha copia do texto, será entón cando desconvocaremos a folga, pero mentras tanto seguiremos adiante”, explicou o voceiro da UXT. “Temos que felicitarnos porque a empresa deuse conta de que actuou mal creando alarma entre os traballadorese rompendo o principio de acordo, sen embargo reflexionou e ao final chegamos a este acordo”, engadiu. FCC tamén se comprometeu a que de cara ao futuro contratarán un tanto por cen de mulleres para evitar a discriminación na empresa.