Adiante coa primeira fase do porto seco de Monforte

O prazo de execución é de sete meses e o investimento ronda os tres millóns de euros

Redacción-Monforte

A delegada territorial da Xunta en Lugo, Raquel Arias, presidiu a semana pasada en Monforte a firma do contrato da primeira fase das obras de urbanización do porto seco da localidade, cuxo investimento ronda os 3 millóns de euros e conta cun prazo de execución de sete meses. A obra de urbanización desta primeira fase, que deberá estar rematada así a comezos do ano que ven, será desenvolta pola empresa lucense Asogal, cuxo administrador, José Luis Iglesias, procedeu ese mesmo día á firma do contrato. No acto tamén estiveron presentes o xefe territorial de Medio Ambiente, Territorio e Infraestruturas, José María López Vega; o director xerente de Xestur Lugo, Jorge Carballeira; e o alcalde de Monforte, Severino Rodríguez.

Firma do contrato da primeira fase das obras do porto seco de Monforte. EC

DISTINTAS FASES

A primeira fase do proxecto ocupará unha extensión de preto de 130.000 metros cadrados (do total dos 307.053 de superficie que terá a nova área loxística). Así mesmo, os usos proxectados para a superficie que se vai urbanizar serán: solo empresarial, que ocupará uns 54.000 m², divididos en cinco zonas; zona de equipamento, que ocupará uns 20.000 m²; zona verde (44.615 m²); plataforma intermodal (5.134 m²); viais e aparcadoiros (7.980 m²). Ademais, a zona da rede viaria que conectará coa estrada Monforte de Lemos-límite da provincia de Ourense e a N-120 tamén será urbanizada; o que suporá unha extensión de 28.687 m². A Consellería de Medio Ambiente, Territorio e Infraestruturas, a través do Instituto Galego de Vivenda e Solo (IGVS), é quen asume o financiamento da obra desta primeira fase que, contando as obras de urbanización, o custe de adquisición dos terreos e os traballos técnicos, suporá un investimento de arredor de 5,56 millóns de euros. No desenvolvemento da totalidade do porto seco de Monforte, a Xunta investirá máis de 12,3 millóns de euros. Trala firma, Arias destacou a gran importancia deste primeiro paso, e lembrou o compromiso do conselleiro de Medio Ambiente, Agustín Fernández de sacar adiante canto antes o proxecto. Pola súa parte, o alcalde de Monforte, agradeceu o apoio da Xunta e amosou a súa disposición a colaborar cun proxecto que permitirá o establecemento de máis empresas na comarca.

Deixa unha resposta

Your email address will not be published.

Nova Anterior

Acordo definitivo entre os traballadores da limpeza de Monforte, sindicato e empresa

Seguinte Nova

Compromisos do goberno provincial de Lugo para este mandato

Últimas noticias sobre ECONOMÍA

     
A %d blogueros les gusta esto: