O Campus de verán da USC en Sarria analiza o camiño de Santiago como vía de comunicación e dinamización

Redacción- Sarria

O Campus de Verán da Universidade de Santiago de Compostela, organiza para a segunda quincena de xullo en Sarria un curso baixo o título O Camiño de Santiago, Comunicación e Dinaminzación Económica. As datas de celebración serán dende o vindeiro 26 ata o 30 de xullo, no salón de plenos do Concello de Sarria. O curso, que conta cun total de 30 horas lectivas e un límite de prazas de 50 alumnos; está cofinanciado polo Concello e a CRTVG. Asimesmo, levarase a cabo baixo a dirección de Luis Celeiro Álvarez.

Programa

A inauguración do curso está prevista para o día 26 de xullo ás catro e media da tarde. Xa ás cinco, terá lugar unha das primeiras conferencias a cargo de Cristovo Ramírez, xornalista e presidente da Asociación de Xornalistas e Estudosos do Camiño de Santiago. Pero ao longo destes cinco días trataranse diferentes temas como o camiño e a súa proxección económica, a riqueza dos recursos naturais no Camiño de Santiago, a súa influenza no desenvolvemento da Galicia interior ou a lei de protección dos Camiños de Santiago. Ademais, a xornada de clausura contará cun debate sobre as Letras Galegas e o Camiño de Santiago, moderado por Xoán Xosé Piñeiro.

Visitas

O Campus de Verán pretende ao mesmo tempo ir máis alá da teoría. Deste xeito, durante a realización do curso, tamén están programadas unha serie de saídas a lugares emblemáticos do camiño. Entre estas visitas figuran unha a Pedrafita do Cebreiro o 27 de xullo, para achegarse ao seu poboado; outra a Triacastela o 28 de xullo, visitando as escavacións na Cova de Eirós; o 29 de xullo ao mosteiro de Samos, e finalmente ese mesmo día, un percorrido cara Loúzara polo roteiro literario Fiz Vergara Vilariño.