No reparto de áreas, repite como deputado do PSOE na zona sur de Lugo, Miguel Ángel Sotuela
Redacción- Monforte
O novo organigrama de goberno da Deputación, así como os Deputados que xestionarán as diferentes áreas do organismo provincial durante os próximos catros anos xa foron dados a coñecer. O certo é que a renovación das áreas e do goberno é notable, sen embargo, tamén hai deputados que repiten nesta lexislatura. Un deles é Miguel Ángel Sotuela, concretamente do PSOE da zona sur de Lugo. Pola súa parte, trátase da corporación con maior presenza feminina da historia da Deputación con 5 mulleres, das que 4 son do PSOE fronte a 1 do PP. Con respecto ao número de cargos, suma 10 concelleiros e 3 alcaldes.
Áreas e responsables
O novo goberno continuará desenvolvendo as políticas iniciadas no anterior mandato, pero dando resposta con novas áreas aos actuais retos que afronta a provincia. As áreas non aumentan con respecto a 2007, seguen sendo 8 (6 do PSOE e 2 do BNG), pero inclúen tamén algunhas novidades. Miguel Ángel Sotuela, como sindicalista e alcalde de longa traxectoria, será o Deputado que xestionará a área de Goberno interior, na que Formación tamén ocupará un espazo importante. Mentres tanto, o resto de áreas repartiranse da seguinte maneira: Emprego, Economía Sostible e Demografía, con Lara Méndez ao cargo; Área de Cooperación e Asistencia aos Concellos con Juan José Díaz Valiño ao cargo; Economía, Recadación e Facenda para a Deputada Delegada Pilar García Porto; Xestión Territorial con Manuel Martínez como Deputado Delegado; e Deseño e Artesanía (CENTRAD), na que a Deputada Delegada será Regina Polín. En canto ás áreas do BNG, Cultura, Turismo, Ensino, Normalización Lingüística e Patrimonio Histórico, será xestionada por Mario Outeiro; e Benestar Social, Deporte, Igualdade e Mocidade, será xestionada por Antonio Veiga. Xunta de Goberno Segundo esta distribución, a Xunta de Goberno estará formada polo Presidente, os Vicepresidentes Primeiro, Antonio Veiga, e Segundo, Lara Méndez; e polos Delegados de cada área: Juan José Díaz Valiño, Pilar García Porto, Miguel Ángel Sotuela, Manuel Martínez, Regina Polín e Mario Outeiro. É de destacar tamén que o organismo provincial incorpora por vez primeira a figura de Vicevoceira, que será desempeñada pola Deputada socialista do partido xudicial de Chantada, Pilar García Porto.
Pleno de organización
Celebrado o primeiro Pleno da nova Corporación provincial, hai que destacar numerosos acordos. Un dos máis importantes, a asignación para o persoal eventual de confianza do equipo de goberno, que diminuirá nun 20% con respecto ao anterior mandato, baixando dos 840.357 euros en 2007 aos 672.286 en 2011. Asimesmo, o orzamento para o funcionamento do goberno provincial aplica unha redución aínda máis notable, chegando ao 25%. As 9,5 dedicacións exclusivas de 2007 redúcense a 7,5; o que supón un aforro de 128.161 euros anuais. Pola súa parte, as retribucións dos dous grupos que compoñen o goberno da Deputación, incluída a do Presidente, permanecerán conxeladas. Con isto, as súas retribucións salariais en comparación coas do inicio do mandato anterior quedan do seguinte xeito: o Presidente baixará de 68.000 euros a 63.502 en 2011; os Vicepresidentes, que tiñan asignado un soldo de 60.000 euros hai catro anos, baixarán a 57.518 euros; os 5 delegados de área pasarán de 52.000 euros a 50.391 euros en 2011; e finalmente, só haberá unha dedicación parcial. Neste caso, o soldo baixa dos 26.000 euros a 25.737 euros. Polo que se refire ás dedicacións exclusivas dos grupos políticos (BNG 1, PSOE 2 e PP 3), cada membro percibirá 50.391 euros.
Plenos e Xuntas de Goberno
O Pleno tamén fixou as datas de celebración das Xuntas de Goberno e dos Plenos. No primeiro caso, estas seguirán tendo lugar todos os venres, ás 11:30 horas. Os Plenos continuarán o martes último de mes, pero pasando a sesión ás 11:00 horas. Así mesmo, tamén se acordou que as Comisións Informativas correspondentes a cada área de xestión estarán integradas, ademais de polo Presidente, por sete membros da Corporación.
