Asociación Donicela: Dezaoito anos animando o verán de Sarria con ilusión e orixinalidade

Redacción-Sarria

A Asociación Cultural Donicela de Sarria organizou un ano máis o XII Edición da Festa Celta Treba Seurra, e a a XVI Enxurrada. Trátase de dous dos eventos máis destacados no verán sarriano, e cunha consolidada tradición. No primeiro dos casos, a festa celta -que se celebrou o sábado 30 de xullo- comezou ás dez e media da noite coa procesión polo río Sarria en batuxo, e co himno galego de fondo. Despois da procesión tiveron lugar as vodas celtas e o desconxuro da queimada, para acto seguido dar paso á queima de Xana Palletas e á actuación dun grupo musical no Malecón. Segundo explicou o presidente da asociación Donicela, Jesús Valcárcel, “nós o que facemos dende hai algúns anos é facer todo xunto, ainda que antes nomeábamos a Donas e Cabaleiros, pero houbo que reducir o presuposto e suspendemos iso, así que agora facemos todo isto e ao acabar comeza o grupo e continúa a verbena”. Pola súa parte, o pasado sábado 6 de agosto celebrouse a décimo sexta edición da Enxurrada, consistente no descenso polo río das barcas máis variadas. Os actos deron comezo ás cinco e cuarto da tarde. “Antes saíamos das Aceas, sen embargo agora, como o río leva pouca auga e o caudal está baixo, o que facemos é saír da Rúa Castelao ata o Malecón”, explica Vacárcel. Despois diso, arredor das seis e media da tarde, tivo lugar a entrega de premios no Malecón, e xa a partir das nove da noite a festa e verbena a cargo dun grupo musical. Ambos actos estiveron organizados pola asociación Donicela e contaron co patrocinio do Concello de Sarria a través da delegación de Cultura, e a colaboración da cafetería Santiago.

Celebración dunha voda celta na recente edición da Festa Celta Treba Seurra. (Cedida por A.C.Donicela).

COLABORACIÓN E APOIO

“As principais novidades deste ano residiron en que despois de catro anos o grupo Ilusión e Arte volveu a colaborar con nós neste evento, especialmente na Treba Seurra”. É preciso ter en conta que se trata de dúas festas consolidadas, de feito, Valcárcel afirma que comezaron con ditas celebracións antes que o Arde Lucus de Lugo. “Se dende aquela houberan colaborado con nós tanto o Concello como a hostalería doutra maneira, a día de hoxe sí poderíamos contar cunha festa celta de renome e recoñecida. Sen embargo, temos un orzamento tan pequeno que co paso dos anos tivemos que ir reducindo actividades”. Agora, dende a asociación prantéxanse a posibilidade de retomar numerosas actividades, e sobre todo, incrementar o apoio do Concello. “De momento, temos que dicir que o actual equipo de goberno tendeunos a man e deunos bastante axuda con respecto a organizar todas estas cousas. Houbo outras veces nas que estivemos bastante limitados e polo tanto tivemos que reducir iniciativas, pero contamos con que a partir de agora poidamos colaborar con eles dunha forma máis estreita e poidamos seguir realizando actividades importantes que deixamos atrás”.

UN DURO COMEZO

O presidente da Asociación Cultural Donicela relata que os comezos foron duros. “Levamos sobre 18 anos de asociación. Nós éramos xente que víñamos doutras asociacións, pero xuntámonos unha vez dous amigos e decidimos crear esta. E unha cousa está clara, os inicios foron bastante difíciles porque comezamos con ideas novas que non sabíamos se ían a encaixar dentro da demanda que había daquela, con respecto ás actividades que nós desenvolvíamos”. Co paso do tempo Donicela foi evolucionando e entre as súas actividades chegou a haber numerosas e diferentes alternativas, e mesmo o recoñecemento de Lucenses do Ano no ano 1998; un galardón que recolleron ao ano seguinte tal e como manda a tradición. “A día de hoxe trataremos de cambiar de local e conseguir un máis amplo para comezar a recuperar actividades como a dun grupo de música folk. Nese grupo o profesor pagábao a asociación, e a xente que participaba non pagaba nada polas clases. E tamén a ver si agora o Concello nos axuda un pouco máis”. E é que hai anos, a agrupación Donicela puxo en marcha actividades tan dispares como a ruta Rey Alfonso IX de 4×4, a campaña de Nadal Para Todos, a baixada de carrilanas, varias edicións do Día da Troita, un grupo de baile, e mesmo unha actividade de kárate e ximnasia de mantemento. “Foron actividades continuas; unhas démolas mantido e outras tivemos que suprimilas, por falta de tempo e por falta de cartos. O que sempre se fixo foi a festa celta e a enxurrada, pero chegamos a ter incluso unha asociación de radioafeccionados dentro da propia asociación. Agora, miraremos de facer un resumo cos principais proxectos para presentar ao Concello e a ver si lle dan luz verde”.

AGRADECEMENTOS

Dende a Asociación Cultural Donicela quixeron deixar claro que moitas das actividades realizadas non serían posibles se non contaran co apoio e colaboración doutras entidades e persoas. O presidente da agrupación destacou especialmente o apoio de catro persoas: “estamos moi agradecidos a José Antonio García, actual alcalde de Sarria, ao concelleiro de Cultura, Francisco Pérez González, e tamén a Manuel Sangil e a Manuel Valiña”, engadiu.

Deixa unha resposta

Your email address will not be published.

Nova Anterior

O Concello de Ribas do Sil mellorará o entorno urbán e instalará unha caldeira de biomasa

Seguinte Nova

Apoio ao deporte en Venezuela

Últimas noticias sobre ASOCIACIONISMO

   
A %d blogueros les gusta esto: