O cine estará agora máis presente que nunca grazas á Rúa do Cine Barbagelata

Redacción-Monforte

No concello de Sober homenaxeouse o pasado 6 de agosto á familia Barbagelata, outorgándolle o seu nome a unha das rúas da vila. Os actos comezaron coa recepción da familia e invitados na Casa Consistorial, a cargo da Delegada da Xunta en Lugo, Raquel Arias, e do alcalde de Sober, Luis Fernández Guitián, para máis tarde, descubrir a placa co nome da rúa.

O Concello de Sober rendiu así homenaxe a unha das familias máis importantes do mundo cinematográfico nacional, pasando a denominar a antiga Rúa do Cine como Rúa do Cine Barbagelata. A familia Barbagelata foi pioneira do cine en España a principios do século XX. Tras percorrer medio país os Barbagelata chegaron a Galicia, e asentáronse en Monforte cara 1910. A finais dos anos 50 Alfonso Barbagelata, coa sua dona Olga Martínez, abriu unha sala de cine en Sober, que pechou a mediados dos 70. Segundo explicou o alcalde, “para Sober é una extraordinaria honra poder unir de por vida un apelido tan importante ao propio pobo”. O programa de actos rematou cunha mesa redonda sobre cine, e unha exposición sobre cine e os Barbagelata.