O organismo provincial ven de aprobar as contas xustificativas dos concellos de Sarria e O Páramo, entre outros

Redacción-Monforte

O voceiro provincial socialista, Manuel Martínez, avanzou que a Deputación está a iniciar obras por valor de 180.000 euros nos Concellos da Pobra do Brollón, A Pontenova e Barreiros. Martínez fixo este anuncio logo de que a Xunta de Goberno acordase o último trámite necesario para o inicio destes traballos: a aprobación dos plan de seguridade e saúde. A institución provincial acondicionará en A Pobra do Brollón os accesos en Abrance, A Pobra, Pinel e do pavillón deportivo municipal. Segundo os responsables provinciais, estes traballos, para os que o organismo provincial achega 55.700 euros, estarán rematado en 2 meses.

Aprobación das contas xustificativas de varios concellos

Por outra banda, na última Xunta de Goberno do mes de agosto aprobáronse ademais as contas xustificativas de 9 obras do Plan de Comunidades Veciñais acometidas nos Concellos de Sarria, O Páramo, Becerreá, Cospeito e Monterroso por valor e 109.000 euros. Desta cantidade, a institución provincial aportou 81.700 euros e os colectivos os restantes 27.300 euros. As actuacións realizadas foron o acondicionamento do local social na parroquia de Santa María de Vilar (Sarria); acondicionamento do local social en Paredes (O Páramo); mellora do camiño da fonte en Vilarmosteiro (O Páramo); acondicionamento de camiños en Vileiriz (O Páramo); formigonado do camiño da igrexa en Liber (Becerreá); construción do local social, depósito de auga e escolleira en Agüeira (Becerreá); renovación da cuberta da igrexa en Becerreá; pintado interior e torre da igrexa de Xermar (Cospeito) e formigonado do núcleo de Seixós (Monterroso).

Plan de Pequenas Infraestruturas

Na súa intervención, Martínez explicou que neste momento a Deputación tamén está a aboar as subvencións de 2011 do Plan de Pequenas Infraestruturas para Concellos de menos de 5.000 habitantes, conforme os municipios entregan a xustificación das obras. Segundo estes datos, a día de hoxe están rematados o 33% dos traballos. Martínez avanzou que “co obxectivo de garantir a realización do 100%, un total de 59 obras que en principio debería estar listas o 15 de setembro, ampliamos en 1 mes o prazo de execución”. Isto supón que, os 54 Concellos beneficiados desta última convocatoria poderán pedir unha prórroga, dirixíndose ó departamento de Cooperación cos Concellos da institución. O tamén Deputado de Xestión Territorial salientou que “tomamos esta medida, conscientes da importancia destas axudas xa que supoñen unha inxección de cartos para os Concellos neste momento de crise, contribúen a manter centos de postos de traballo nun sector tan castigo como o da construción e logran crear novos servizos ós veciños, aforrando estes custes ás arcas municipais”.