Redacción-Sarria
O pasado venres día 2 de setembro, o concello de Sarria viviu unha xornada histórica: a décimo terceira etapa da Vuelta Ciclista a España saiu desta localidade. Un percorrido que se adentrou así por primeira vez na zona dos Ancares, nunha das etapas máis complicadas de toda a edición. Tal e como xa sinalaran dende o propio Concello, con saída inédita dende Sarria e final en Ponferrada, esta foi a sexta vez que a capital do Bierzo recibiu a carreira, cun percorrido de pouco máis de 150 quilómetros nos que se atoparon con tramos como o alto de Folgueriras de Aigas, o Porto de Ancares, ou o de Ocero, xa coñecido na carreira.
Pola súa parte, a zona do Chanto foi o espazo no que se instalaron o control de firmas e o punto de encontro da Vuelta. Por alí, ademais dos ciclistas, pasaron numerosos afeccionados que quixeron ver aos corredores e pedir autógrafos aos seus ídolos. Un dos máis aclamados foi Alberto Contador, que pese a non competir na proba, decidiuse a achegarse ata a localidade. Pero mención especial merece tamén o corredor David Blanco, o único galego que participou na proba. Mentres tanto, as rúas Benigno Quiroga, Castelao, Curros Enríquez, Matías López (até Catro Camiños), Calvo Sotelo (desde Catro Camiños até o ambulatorio) e a avenida de Becerreá, constituíron o escenario de carreira, establecemento de equipos, corredores e coches oficiais. Con todo isto, ante un espectacular control de seguridade e centos de afeccionados e curiosos, o pelotón deu comezo coa carreira á unha do mediodía. É de destacar que nesta etapa o gañador foi o ciclista suizo de HTC, Michael Albasini, tras resolver a fuga do día na meta de Ponferrada. A provincia de Lugo acolleu así, anos despois, unha das etapas máis características desta edición 2011, na que por primeira vez Sarria foi punto de encontro e de saída.
