O equipo competirá na liga Provincial da Federación Galega

Redacción-Monforte

No concello de Bóveda ven de crearse unha nova asociación deportiva chamada A.D. Río Mao. A iniciativa surxiu, segundo explicou o seu presidente, Javier Domínguez, despois de valorar moitos aspectos. “Temos o pavillón aquí ao lado, e ademais os rapaces que integran o equipo sempre nos estaban dicindo porque non facíamos algo. Eles ofrecéronse, e tendo en conta a súa disposición, e tamén a súa preparación, xa que viñan do antigo equipo, comezamos a facer reunións e a facer realidade o proxecto”.

DIRECTIVA

Con sede no concello de Bóveda, a asociación comezou a xestarse hai aproximadamente seis meses, ata que o resultado foi unha directiva encabezada por Francisco Javier Domínguez, e co apoio de Luis José Senra, Jose Luis Vázquez, Abraham López, Miguel A. Domínguez, Oscar González e Juan Diéguez. Que a súa creación fose recente implicou que colleran a competición a medio camiño, polo que a asociación iniciará agora a súa andaina na liga Provincial da Federación Galega de Fútbol Sala na tempada 2011/2012. Para isto conta cunha plantilla formada por xogadores da zona de Bóveda e Monforte, “aproximadamente uns 17 rapaces”, quenes militaban nas ligas locais da zona. Pola súa parte, o adestrador está a ser Juan Diéguez, co que xa están a desenvolver a pretempada os rapaces, adestrando tres días á semana e participando nos torneos locais da zona. En canto aos obxectivos fixados pola directiva para esta campaña, figuran os de estar na zona alta da táboa e ter unha toma de contacto coa categoría. “De momento descoñecemos o calendario de liga, ainda que todo apunta a que dará comezo no mes de outubro. Sen embargo, o incio da pretempada foi o pasado 23 de agosto”.

Javier Domínguez destaca que mentres tanto, a directiva está a manter varias reunións para falar sobre temas como son a financiación. “Contamos coas cuotas dos socios e temos tamén varios patrocinadores, e por suposto a colaboración do Concello, que pon a disposición nosa o pavillón municipal. E como concelleiro de Deportes teño que remarcar que dende o Concello contamos coa súa colaboración, pero en ningún caso coa financiación do equipo; só colaboración, como o pavillón ou os materiais que necesitamos”. E é que os partidos xogaranse así no Pavillón Municipal de Bóveda que o Concello puxo a disposición da asociación.