Aberto o prazo de matrícula na Escola Municipal de Música e Danza

As clases de todas as especialidades impartiranse no Edificio Multiusos

Redacción-Monforte

Xa está aberto o prazo de inscrición para todos aqueles que queiran recibir clase nas escolas municipais de música e danza. As clases iniciaránse o 3 de outubro, pero a matrícula estará aberta durante todo o ano, un feito que permite este tipo de ensino non reglado e enfocado quizáis cun carácter máis lúdico.

Nisto e na apertura das escolas a todas as idades a partir dos catro anos, facía fincapé a concelleira de Cultura, Pilar López, durante a presentación desta actividade, na que estivo acompañada por tres dos cinco profesores que impartirán as clases. Algúns deles compartirán a ensinanza coa que xa imparten no Conservatorio. A oferta é moi variada, dende a danza, a gaita, a percusión ata outros instrumentos de vento madeira e vento metal ou corda. Moitas das disciplinas están encamiñadas a que os alumnos pasen a formar parte da Banda do Concello e todas as aulas estarán este ano emprazadas no edificio Multiusos, deixando a Casa da Cultura, co fin de unificar as escolas de danza e música e economizar.

Os 12,02 euros mensuais son o custe que teñen estas actividades, e por este importe os alumnos poden participar en todas as disciplinas que desexen. O pasado curso, que rematou no mes de xuño, contou cun total de 388 matriculados.