Redacción – Chantada
Chantada, Amandi e Quiroga Bibei foron as subzonas máis madrugadoras no inicio da vendima na Ribeira Sacra. Este xoves o 15 de setembro a recolleita da uva daba pistoletazo oficial de saída, a pesar de que varias adegas levaban xa días introducindo froito baixo permisos puntuais e motivadas polo bo grao de maduración co que conta o produto. O comezo fixado polo Consello Regulador fixouse unha semana antes que na pasada campaña, e segundo indican dende Ribeira Sacra as condicións que presenta a uva son excepcionais e todo parece indicar que “ será unha gran campaña para a Denominación”· Este ano elaborarán viño ao amparo da D.O. 92 adegas e encargaranse de vixiar o proceso 16 veedores, ademáis dos técnicos propios do C.R.D.O.R.S. e da Directora Técnica. Dende o pasado 1 de setembro ata o día 14 levábanse recollido máis de 300.000 quilos de uva.
A xulgar polos primeiros comentarios dalgúns viticultores o volume da colleita será este ano moi considerable, cando menos superando con creces á produción da pasada campaña. Tamén algúns expertos a nivel estatal teñen destacado que en toda Galicia, en contraposición cou outras zonas produtoras de España, se está a observar unha gran colleita en cantidade. Polo xeral o estado sanitario é bo e a uva, xa que onde houbo ataques de mildeu perdeuse parte da colleita, pero a restante presentaría boas condicións.
PREMIADOS NA III CATA DOS VIÑOS DE GALICIA
E grazas ao proceso de elaboración dos caldos de Ribeira Sacra que comeza precisamente na vendima, os viños deste territorio continúan o seu proceso de promoción axudados polos recoñecementos coma o que a vixésimo terceira Cata dos Viños de Galicia ven den conceder dentro de cada D.O. galega. No caso de Ribeira Sacra o Acio de Ouro foi para Rectoral de Amandi, o de Prata para Regina Viarum e o de Bobronce para o mencía Casa Moreiras.
VISITA DO CONSELLEIRO Á ADEGA GUÍMARO
O conselleiro de Medio Rural, Samuel Juárez, visitou recentemente a adega Guímaro, de Sober, pertencente á Denominación de Orixe Ribeira Sacra. Na súa visita, Juárez destacou a importancia de investir en tecnoloxía como fórmula para mellorar a competitividade nas explotacións vinculadas ao eido vitivinícola, como é o caso desta adega soberina. Entre as novas ferramentas de traballo cabe salientar un cabezal etiquetador. Ademais amplíase a capacidade de elaboración, logo da adquisición dunha cuba e de barricas, que permitirán mellorar a calidade do viño en madeira. Os investimentos para potenciar estas melloras supera os 34.000 euros, subvencionados nun 30% por Medio Rural.
