As obras para adultos terán lugar os mércores ás oito e cuarto da tarde e para infantil e familiar os domingos ás seis, no multiusos

A concelleira de Cultura de Monforte, Pilar López, ven de presentar a programación teatral para o último trimestre do ano; organizada en colaboración coa Axencia Galega das Industrias Culturais (AGADIC), a través da Rede Galega de Teatros e Auditorios á que únicamente pertence o Concello de Monforte, en toda a zona sur de Lugo. Pilar López explicou que “dende o Concello consideramos que o teatro é cultura, pero tamén espectáculo en directo, e por suposto o refelxo da realidade. Ademais, son obras que invitan á reflexión e ao fomento da imaxinación. Por todo isto fixemos un importante esforzo económico e organizativo para seguir mantendo estas representacións e divulgar a cultura”. No programa teatral distínguense dous grupos de obras: unha para adultos e outra para infantil e ámbito familiar.

As obras para adultos terán lugar os mércores ás oito e cuarto da tarde no edificio multiusos, mentres que a programación infantil desenvolverase os domingos ás seis da tarde no mesmo lugar. Neste último caso preténdese “facilitar a convivencia e o lecer en familia a través da cultura”. En canto á programación para adultos, esta comezará o día 5 de outubro coa obra “Viva a Crise” da compañía Fulano, Mengano e Citano; e xa logo continuará o 19 de outubro coa obra “American café” da compañía Teatro do Morcego; o día 16 de novembro coa obra “Memorias das memorias dun neno labrego” de Abrapalabra Creacións Escénicas; o 30 de novembro con “Limpeza de sangue” de Espello Cóncavo; e rematará o 14 de decembro co espectácuo de maxia do Mago Rafa, “El arte de lo imposible”. Para os nenos dará comezo o 9 de outubro coa obra “Cinderela Mix”, de Artello teatro, e continuará o 30 de outubro con “Ringo rango” de Pistacatro Produtora de Soños; o 13 de novembro coa obra “Trogloditas” da compañía Tanxarina; para rematar o 27 de novembro coa obra “Frankenstein” de Ghazafelhos.

O prezo das entradas é de 4 euros en xeral, e de dous euros para nenos, estudantes, xubilados e desempregados. Dende o Concello, Pilar López animou a todos os veciños, e ao resto da comarca, a participar da actividade cultural, “que habitualmente soe ter moi boa acollida”. As obras están financiadas ao 50% polo AGADIC (só o caché), e o 50% o Concello.