O seguinte paso será determinar a cantidade económica que precisa

Técnicos da Deputación e da Xunta visitaron o pasado luns o parque de bombeiros das Lamas, en Monforte, iniciando deste xeito, a integración deste complexo no Consorcio Provincial. Na visita, avaliaronse as necesidades técnicas que presenta esta infraestrutura para a prestación dun servizo axeitado. Agora, tendo en conta os informe dos técnicos, determinarase a cuantificación económica que deberá percibir o complexo das Lamas. Esta será detallada no orzamento para 2012 do Consorcio que se aprobará este mesmo mes, no próximo Pleno de dito organismo. A continuación, co obxectivo de axilizar a integración do parque monfortino prevista para 2012, a Deputación requerirá ao Concello de Monforte a transferencia de bens e toda a información necesaria do complexo. Logo, o organismo provincial dará orde á empresa adxudicataria, Natutecnia -a mesma que xestiona os parques da zona sur- para que comece co proceso de selección dos 19 efectivos que terá o parque: 15 bombeiros, 1 sarxento e 3 cabos.

A integración do parque das Lamas no Consorcio incrementará a cobertura contraincendios nos municipios de Monforte de Lemos, Pobra do Brollón, Quiroga, Ribas do Sil e Sober, garantindo a prestación as 24 horas durante todo o ano. Estes veciños xa contan co servizo dende a posta en marcha dos parques de bombeiros de Chantada e Sarria. Ditas instalacións atenderon un total de 55 emerxencias, na súa maioría incendios, dende o 1 de maio e ata o 30 de setembro, acontecidas en numerosos concellos da comarca e arredores.

Opinan os bombeiros

Dositeo Piñeiro é un dos profesionais con máis de vinte anos de experiencia no parque de bombeiros de Monforte. Na súa opinión, que este servizo pase a integrarse no Consorcio Provincial, “traerá cousas positivas e outras non tan positivas”. “Baixo o meu punto de vista pode ser que os beneficios da integración redunden en que haberá máis medios e máis persoal, pero aínda así tamén teño que dicir que ata o de agora prestamos un servizo eficaz. Pola outra parte, o que lle vexo de negativo, e do que ninguén está a falar, é que un servizo que constitucionalmente se prestaba de xeito gratuito, a partir de agora será privado e polo tanto terano que pagar os veciños, os afectados polos incencios, comunidades veciñais, etc. Creo que en si, ao Concello de Monforte, ao que é o propio Concello, non o vai a beneficiar en nada, posto que coa integración, os servizos teranos que pagar os veciños. Fálase por exemplo de que contaremos con máis medios, e iso está ben, e máis persoal, peron ningúen fala sobre o custe que a xestión privada vai acarrear aos cidadáns. Tampouco sabemos moi ben cales serán as nosas funcións a partir de agora, non están ainda definidas. E o mesmo ocorre cos catro funcionarios interinos que xa non continuarán”.