O concello de Bóveda organiza unha programación sociocultural dirixida a todas as franxas de idade, e que implique en maior medida aos veciños
O Concello de Bóveda ten preparada unha programación sociocultural para o curso 2011-2012 destinada a todas as idades, “pero sobre todo pensando na dinamización das parroquias”. Así o explicou a concelleira de Cultura durante a presentación da mesma, onde tamén sinalou que para isto será necesaria a colaboración dos veciños. “Fixemos un boletín informativo que enviamos a todas as casas. A partir de agora, sempre que haxa un mínimo de veciños que queiran levar a cabo unha actividade na súa parroquia, dende o Concello facilitaremos todos os medios posibles para que esta se realice”. En canto ás franxas de idade, a técnico de Cultura, Angelina Gándara, explicou que o programa comprende actividades para “todas as franxas de idade: nenos, xuventude, persoas adultas e maiores”. Neste senso, para nenos destacan algunhas iniciativas como son a práctica de determinados deportes, baile tradicional, iniciación á música, informática, inglés e por suposto a ludoteca. Para xuventude, as actividades abarcan dende a fotografía dixital ata un obradoio de orientación laboral, pasando por inglés, banda de gaitas ou pandeireta. Pola súa parte, para persoas adultas e maiores o programa sociocultural comprende actividades como informática, cesteiría, pintura ao óleo, restauración de mobles, manualidades, arte floral e ximnasia de mantemento en parroquias. A maiores de todo isto, outra das novidades deste ano é o programa Medrando Xuntos, que consiste nunha serie de charlas de interese educativo e de carácter xeral, que pretenden ser unha escola para pais. Entre os temas a tratar neste programa atópanse algúns como a seguridade e os riscos en internet, a prevención de drogodependencias e hábitos saudables, ou a importancia do xogo, o xoguete e de como mercalos.
O alcalde de Bóveda, José Manuel Arias, quixo destacar tamén que dende o Concello -e dentro das súas posibilidades- están abertos a facer calquer tipo de actividade ou curso que propoñan os veciños. Dentro da programación sociocultural inclúense actividades gratuitas e outras cuxos prezos oscilan entre os 5 euros todo o curso, e os 54 euros mensuais, como é o caso de inglés. Os interesados en participar nalgunha destas actividades poderán realizar a incrición no Concello, en horario de nove da mañá a unha e media do mediodía.
