A programación sociocultural inclúe tamén unha exposición fotográfica
Ao igual que está a ocorrer en moitos dos concellos da comarca e arredores, en A Pobra do Brollón xa teñen en marcha algunhas das actividades culturais para este outono-inverno. Así por exemplo, este sábado día 29 haberá teatro na Casa da Cultura ás seis e media da tarde. Mentres tanto, o luns 31 terá lugar unha exposición fotográfica, que segundo explicou o concelleiro de Cultura, Ricardo Rodicio, “é dun rapaz daquí, de Pradelas”. “Ademais, a exposición está organizada polos mesmos que organizan o Outono Fotográfico en Ourense”, engadiu. É de destacar especialmente o magosto, que a falla de concretar ainda algúns detalles e definir o programa concreto dese día, o responsable de Cultura sinalou que se celebrará o vindeiro 12 de novembro.
BOA ACOLLIDA DOS OBRADOIROS
A maiores das citas típicas destas datas, a programación sociocultural de Brollón inclúe unha serie de obradoiros de ximnasia e de memoria, que dende comezos do mes de outubro se están a levar a cabo polas distintas parroquias do municipio. En relación a isto, Ricardo Rodicio quixo destacar a boa acollida que están a ter ditos obradoiros. “Lévanse a cabo de xeito continuo; comezando por exemplo ás dez da mañá nunha parroquia e rotando ata pasar por diferentes lugares. Ademais, están tendo moi boa aceptación por parte dos veciños, xa que nalgún caso os obradoiros contan con grupos de dez e doce persoas. É máis, aquí mesmo, en Brollón o grupo é de 20 persoas”. Ditos obradoiros están impartidos por técnicos especializados e realízanse dous días á semana. Por outra banda, todos os xoves na Casa da Cultura tamén se imparte un taller de manualidades. Dende a Concellería de Cultura sinalaron finalmente que a todo isto sumaranse unha serie de actividades que en breve agaradan poder poñer en marcha.