Curso en Quiroga sobre os Bonsais

José Antonio Peña Alonso, técnico monfortino en Bonsais impartirá un curso sobre estas pequenas plantas o vindeiro 12 de novembro na Casa da Cultura do concello de Quiroga. Segundo el mesmo explicou, trátase de dar a coñecer e achegar un pouco máis este mundo a todos aqueles que estén interesados sexan ou non profesionais. “Todo está relacionado co Grupo de afeccionados do bonsai Val de Lemos formado hai uns anos, e co que tratamos de promocionar o mundo do bonsai a través dos colaboradores deste grupo; cada un coas súas pezas”, explicou José Antonio. Ademais do curso de Quiroga, o vindeiro 3 de decembro tamén se impartirá outro no concello de Sarria. O cursos son gratuitos e están abertos a todo o público en xeral. “Estamos comezando a temporada, así que a maiores deste que impartiremos por primeira vez en Quiroga, e o de Sarria, de aquí ao mes de maio temos previsto facer algúns tamén en Sober, en Pantón, e probablemente outro na tenda que teño en Monforte, en Jama”. O técnico monfortino apuntou tamén que en xeral a experiencia de impartir este tipo de cursos sempre foi positiva. “Por desgraza participa menos xente da que nós desexariamos; soen ser grupos de 15 persoas, 20 nalgún caso, e que cando ao mellor ven o traballo que dan estas plantras renuncian a seguir. Pero bueno, sempre é interesante e moi gratificante amosarlle á xente o que facemos”. Peña tamén destacou que o que pretenden dende este grupo é ofrecer o mundo dos bonsais á xente para que deixen de velo como un regalo. “O que queremos é que a xente aprecie todo o que se pode facer con estas pezas, como se poden ir modelando, construindo, ata facelas únicas e singulares e non só un mero regalo”. Pola súa parte, no curso de Quiroga tratarase en principio un pouco a historia dos bonsais, tamén as técnicas de cultivo e mantemento, e logo haberá unha parte práctica para entrar en materia vendo como se transforma unha planta de viveiro en bonsai. Cómpre destacar que cultivar e manter un bonsai tamén ten un prezo. José Antonio sinalou que o custe medio pode andar entre os 50 e os 60 euros, “pero por suposto as plantas que nós remodelamos non valen 50 euros porque entendemos que non sería axeitado para o curso”, concluíu.