A renovación dos programas europeos e a súa correcta execución ano é a base dun orzamento provincial que supera lixeiramente ao de 2011. Un total de 25 millóns de euros serán os que invista a Deputación gracias aos programas con fondos comunitarios para materializar as súas propostas, encamiñadas fundamentalmente á fixación de poboación no rural a través do fomento da actividade económica neste ámbito. Os programas europeos renovados son os referidos ás novas tecnoloxías, os programas de economía medioambiental e a creación de emprego. Por unha banda, revalidarase o programa de administración electrónica, Innova-TE 2, con case 15 millóns de euros, que foi o cuarto que conseguiu máis financiamento en España. Co Innova-TE 1 ofreceuse aos Concellos, xa no pasado ano, recursos como o asesoramento, equipamento informático ou a banda longa nas casas consistoriais. Paralelamente, a Deputación seguirá a impulsar o programa de economía medioambiental “Lugo2”, superará os 6,5 millóns e nun terceiro ámbito, o de creación de emprego, denominado Pacto provincial polo emprego 2, que en 2012 contará con 3,5 millóns que irán destinados á formación de 1.200 desempregados. En total, serán 17.781.162 euros os correspondentes á subvención europea, e o restante (ata 25 millóns), á parte proporcional que aportará a Deputación para executar durante 3 anos.
RECORTES NO GASTO CORRENTE E EQUILIBRIO ORZAMENTARIO
Todo isto foi exposto polo presidente da Deputación Provincial, Jose Ramón Gómez Besteiro, o pasado xoves no Parlamento de Galicia. Ademais do presuposto da propia Deputación, o orzamento consolidado constará do correspondente ó Instituto Lucense de Desenvolvemento Económico (INLUDES), con 8 millóns, e a Sociedade Urbanística Provincial (SUPLUSA), con 7 millóns. Gómez Besteiro explicou que o presuposto da Deputación reduce en 2 millóns o gasto corrente, principalmente no capítulo de persoal, que baixa nun 13%. Os gastos de persoal pasan de 1.863.000 a 1.590.000 euros. Segundo os datos proporcionados pola Deputación, os asesores reduciríanse con respecto ao pasado mandato nun 20%, aínda que os dependentes de Presidencia baixaron máis, nun 30%. En canto á partida para o funcionamento da corporación provincial, aplícase un recorte do 25%. Neste senso, os soldos do Presidente e do equipo de goberno están conxelados dende o 2010, antes da entrada en vigor do Real Decreto de Redución do Déficit Público. A débeda tamén rexistra unha importante baixada, ao amortizarse 4,6 millóns, cumpríndose de novo coa estabilidade económica financeira, e atribuíble ao plan aprobado hai agora tres anos co fin de equilibrar as contas, e que convertía á de Lugo na primeira Deputación galega en facelo. En canto aos ingresos, a Deputación, segundo incidiu o Presidente, mantén as achegas dos ingresos do Estado, pero ten que devolver a liquidación definitiva dos ingresos do 2009, que sumarán 5,8 millóns de euros no 2012.
OBXECTIVOS: RESIDENCIAS, CENTRO DE RECRÍA E MANTEMENTO DOS PARQUES DE BOMBEIROS
O obxectivo de Besteiro é que as contas, que contemplan partidas para executar a rede provincial de residencias e o centro de recría, “dous proxectos que inciden directamente no asentamento demográfico”, se aproben neste mes e entren en vigor o 1 de xaneiro. A construción dunha rede de 12 residencias da terceira idade con centros de día en varios concellos da provincia, e a subvención do proxecto técnico para o xeriátrico de Becerreá e as obras de remate da residencia de Monterroso require de 15 millóns de euros e implicará a creación de 500 prazas coa xeración, segundo destacou Besteiro, de “ducias de postos de traballo”. Neste punto, Gómez Besteiro fixo un chamamento á Xunta, “que está retrasando a execución das residencias”, para que a Administración autonómica concerte prazas, “como fai ata cos centros privados, cumprindo non só coa súa obriga competencial, senón co seu compromiso político antes das eleccións”.
A construcción na Granxa Gayoso Castro, o primeiro centro público de recría de gando en España, do que se está a levantar a primeira fase que implica máis dun 50% do total, suma case 6 millóns de euros financiados con fondos propios. Con capacidade para 3000 novillas supón, segundo destacou Gómez Besteiro, unha das máis fortes apostas polo campo nos últimos tempos, e destinado a aforrar importantes custes aos gandeiros obrigados a recriar fóra da comunidade. Por outro lado, a Deputación fai unha previsión económica de máis de 2,4 millóns de euros no orzamento 2012 para a rede de parques de bombeiros comarcais, posta en marcha este ano e co financiada pola Xunta.
RECLAMACIÓNS ANTE A XUNTA
Durante a súa comparecencia no Parlamento, o presidente provincial reivindicou, ademais da transferencia de estradas impropias -no orzamento resérvanse 11 millóns de euros para manter a rede provincial de estradas máis extensa de toda España, con 4.200 quilómetros- “un pacto de país no que as diferentes forzas políticas e institucionais definamos dunha vez por todas o noso papel, as liñas mestras da reordenación do sistema de competencias locais, acompañada, esta vez si, do financiamento local axeitado”. Gómez Besteiro fixo referencia a un novo modelo económico baseado na conciencia e na autoestima, e na necesidade de “repensar Galicia” para afrontar o problema do despoboamento e o equilibro territorial. Neste senso, puxo como exemplo as accións acometidas pola Deputación coa creación dunha área propia de goberno neste asunto, abríndoo nun foro ó debate público e institucional onde, quixo lembrar, “a Xunta foi a única administración que declinou participar”.
PREOCUPACIÓN MUNICIPAL POLOS RECORTES DA XUNTA NAS PARTIDAS PARA A ATENCIÓN SOCIAL NOS CONCELLOS
A Deputación asesorará xuridicamente ós Concellos da provincia para que recurran perante o xulgado o “drástico” recorte que a Xunta vén de aplicar na atención social, “incumprindo así as bases establecidas nos programas de 2011 de atención a persoas maiores, inmigrantes e minorías”, segundo consideran dende o bipartito provincial. Ademais, o equipo de goberno da Deputación esixe á Xunta que revise as axudas incluídas nesta iniciativa. A través da Área de Cooperación cos Concellos remitirán unha carta a todas as entidades locais que decidan sumarse á iniciativa, facilitándolles os medios necesarios. O deputado provincial Manuel Martínez subliñou que esta decisión da administración autonómica retrotraerá á provincia “á época da beneficencia”, xa que a media dos recortes para os Concellos se situaría, segundo fontes da Deputación, no 80%, o que dificulta que as entidades locais recuperen os cartos que adiantaron para a posta en marcha do programa de atención social. Martínez subliñou que esta medida se fixo, ademais, sen contar coa poio da FEGAMP. Por outra parte afirman que o Partido Popular, “a parte de asfixiar economicamente aos Concellos e deixalos nunha situación moi difícil a final de ano, minte, terxiversa e manipula dicindo que o recorte só é do 5%”.
A DEPUTACIÓN MANTERÁ A AXUDA A DOMICILIO
Pola súa parte, o deputado nacionalista Antonio Veiga subliñou que a Xunta ataca ó emprego feminino con estes recortes, e afirmou que a Deputación manterá a súa partida para a axuda a domicilio.
ALARMA NAS COMARCAS DE LEMOS E CHANTADA POLOS “DRÁSTICOS” RECORTES AUTONÓMICOS
Dende a zona sur de Lugo, o alcalde de A Pobra do Brollón, Xosé Luís Maceda, foi un dos primeiros en amosar o seu malestar polas políticas sociais da Xunta e os recortes en canto ás prestacións do servizo de axuda no fogar. Segundo Maceda, trátase dunha reducción «drástica e significativa» que suporá “unha diminución no número de veciños que poidan acceder á prestación e un empeoramento da calidade do servizo ás persoas que poidan seguir percibíndoo”. Maceda acusa ao presidente da Xunta de non contar a verdade cando asegura en público que non haberá recortes nos servizos sociais, e advirte que medidas como esta axudan a asfixiar máis as economías locais. Ademais, o Consello Comarcal do BNG tamén se puxo mans á obra a través dun acordo que chama a atención da administración autonómica sobre estes recortes para as políticas de atención social dende os concellos, xa que consideran que está en perigo a pervivencia de moitos servizos de xeito inmediato. No caso de Monforte, por exemplo, as partidas destinadas á axuda domiciliaria dende a Xunta terían caído este ano nun 46%, segundo a responsable comarcal do BNG, Alicia Cadarso. Os nacionalistas da zona sur anunciaron que se convocaría a todos os alcaldes da área co fin de tratar este asunto máis aló das cores políticas. En Chantada, o voceiro municipal desta formación, Ildefonso Piñeiro, xa ten solicitado un pleno extraordinario por mor deste asunto. Segundo os datos facilitados polo que fora tenente de alcalde durante o pasado mandato, o Plan Concertado de Prestacións Básicas de Servizos Sociais, cuxa resolución chegou nos pasados días ao Concello de Chantada, implica “un recorte drástico e inxustificado nas achegas da Xunta relativas aos gastos anteriores”. No ano 2010 por este concepto o Concello recibiu a cantidade de 35.760,24 euros, mentres que para este ano 2011 só se van a dispoñer de 9.057,25 euros, 26.703 euros de diferenza, segundo os datos aportados.
PREOCUPACIÓN CIDADÁ E SOLICITUDE DE “AUSTERIDADE” NO SAVIÑAO PARA MANTER AS POLÍTICAS SOCIAIS
Dende outros ámbitos coma o cidadá, a Asociación Veciñal do Saviñao, diante das medidas de reducción e recorte por parte da Xunta de cara aos concellos na asistencia domiciliaria, solicitou que “haberá que renegar das catro dedicacións exclusivas impostas este ano na corporación do Saviñao e adoptar medidas realistas”. A asociación xa leva tempo denunciando continuos recortes en gasto público e social neste municipio, e “agora co recorte na imprescindible asistencia a domicilio dos incapacitados” -que neste concello se cifran nunhas 200 persoas, segundo os datos da asociación-, o colectivo solicita ao goberno local que se adecúen os presupostos á realidade cun Plan de Austeridade Municipal e coa consecución de prazas concertadas na residencia de Escairón.
Cargando ...
