O centro de información á Muller-CIM de Monforte atendeu 1.140 consultas durante o primeiro semestre do ano en curso, das cales 729 foron relativas á atención xurídica, 234 á atención psicolóxica, 139 a temas relacionados co emprego, e 38 referidas a recursos e programas específicos para as mulleres. En canto á violencia de xénero, a concelleira de igualdade, Ana Casal, destacou nos pasados días que se atenderan 32 casos durante o ano 2010 e que, nos dez primeiros meses do 2011, xa atendera 39 novos casos. Casal falou de que cada día hai máis denuncias, máis información e medios para realizalas, pero que aínda queda moito por facer.
O lema baixo o que se organizan as actividades do Día Internacional para a Eliminación da Violencia de Xénero, que se conmemrora o 25 de novembro, é “Se a silenciamos…, tamén maltratamos””, un lema que Ana Casal considera moi axeitado xa que, segundo comentou, “o problema é de toda a sociedade e todos somos cómplices se ante o coñecemento dun posible caso de violencia de xénero non o denunciamos”.
Dende o Concello convidaron a toda a cidadanía a participar das actividades que están en marcha durante todo o mes. O programa pode consultarse na web municipal www.concello de monforte.com.
