O Comité organizador do 1º Foro Social Local de Monforte vinculado ao movemento 15M fixeron unha primeira e positiva valoración dos actos. Segundo un comunicado, afirman que “hai quen di que o Foro foi un fracaso por ter mesas con 20 ou 30 persoas de público, ou actos con case 70 asistentes. Quen mida así o éxito do encontro estará reducindo o seu sentido orixinal para que se perda”. Segundo relataron, este foro supuxo un encontro de persoas “con creatividade e proxectos” e con sensibilidades comúns dende diversos eidos.
Entre as conclusións do foro está a teima de que “outro mundo é posíbel” e as novas concepcións para gobernos e banca. O movemento de indignados da comarca de Lemos afirma estar sintonizado con outros movementos deste tipo ao longo de todo o país, e sobre todo “cunha nova sensibilidade emerxente no planeta”. Os xeitos de chegar a un mundo mellor pasan por ideais como os de “comunicarse moito mellor, informarse con independencia, procurar a xustiza social, fortalecer a identidade e a cohesión solidaria, promover boas prácticas no agro e o coidado da natureza e mais do espírito”, entre moitas outras premisas. O Foro pretendeu fomentar novos proxectos para a bisbarra. As propostas concretas compartidas na asemblea celebrada o 28 de novembro poden ser coñecidas achegándose ás asembleas semanais dos luns ás 19:00 ou contactar co movemento en acampadamonforte@gmail.com, forosocialdemonforte@blogspot.com ou bankomun.blogspot.com
