A Concelleira de Cultura de Monforte, Pilar López, presentaba nos pasados días o conxunto de actividades que este ano se impulsarán dende o Concello. Os máis pequenos serán novamente os privilexiados, e as actividades tradicionais conxúganse con algunhas iniciativas máis novidosas, actuacións musicais, exposicións, maxia e certames de beléns e poesía.
CAMPAMENTO LÚDICO BILINGÜE
O campamento para rapaces conforma unha das novidades, xa que este ano está enfocado ademáis de ao xogo a aprendizaxe do inglés. O campamento, para o que xa rematou o prazo de inscrición, terá lugar do 23 ao 30 de decebro e do 2 ao 5 de xaneiro, deixando libres as datas nas que os rapaces adoitan ter ocupado o seu tempo. Outra das actividades novidosas foi unha charla que achegou aos cidadáns aos perigos e á prevención na utilización de internet e as redes sociais e que se celebrou este 19 de decembro.
PANXOLIÑAS E MÚSICA CLÁSICA
Na programación existe unha destacada presenza da maxia e de actividades musicais como a Mostra de Panxoliñas ou o Concerto de Corais que se celebrarán no Edificio Multiusos. A primeira será este 20 de decembro ás 18:00 horas e correrá a cargo dos alumnos dos centros de ensino de Monforte, chegando xa á súa decimoterceira edición. O concerto de corais será o 23 de decembro coa participación da Coral Polifónica Vilalbesa, a do Concello de Monforte e a Banda de Música do Concello de Monforte, que actuarán ás 20.00 horas. Non faltará o que xa ven sendo un clásico no Nadal monfortino, o concerto da Familia Moriatov, que terá lugar o 26 de decembro ás 20:00 horas na casa da Cultura, impulsado pola Sociedade Filarmónica de Monforte. Xa o día 30, a rondalla Benfeita da Estación ofrecerá no mesmo escenario o seu concerto de Nadal.
MAXIA E REIS MAGOS
Pero os máis pícaros tamén terán os seus espectáculos específicos, destaca o que o sexto Circuito Galego de Maxia achegará á cidade do Cabe o día 3 de xaneiro a partir das 18.00 horas no Multiusos. Tamén os Reis Magos chegarán novamente o día 5 de xaneiro para repartir ledicia polas rúas, faráno coma sempre en tren e dende a estación de ferrocarril abrirán o seu percorrido. A responsable da área de Cultura anunciou que está aberto o prazo de inscrición para participar como paxes para acompañar ás Súas Maxestades de Oriente. Os rapaces e rapazas de 5º e 6º de primaria e de 1º de ESO que queiran participar deben anotarse na Oficina Municipal de Cultura, situada na Casa do Concello, entre as 9:00 e as 14:00 horas. Xa o día 6, os Reis visitarán , coma sempre, os distintos locais sociais de Monforte e as súas parroquias, pola mañá terá lugar a Misa de Reis no Fogar San Xosé, cantada pola Coral Polifónica do Concello.
EXPOSICIÓNS DE FOTOGRAFÍA E TRABALLOS DE NADAL
Deica o 23 de decembro permanecerá expostos na Casa da Cultura os taballos seleccionados no Concurso de Tarxetas de nadal impulsado polo Concello AMAFER, ADIF, RENFE e no que participaron os alumnos dos colexios do municipio. Esta dará paso a outra exposición fotográfica a partir do 26 de decembro e que se basea nos traballos dos aprendices de fotografía do Curso Outono Fotográfico impartido por Jesús R. Montero. Paralelamente, no edificio Multiusos estará dende o 24 de decembro a exposición permanente sobre o Conde de Lemos Pedro Fernández de Castro, haberá tamén unha proxeccion dun video sobre a súa vida e obra.
OUTRAS ACTIVIDADES
O Concurso de Beléns entre centros de Ensino e o Certame de Poesía Infantil organizado dende a Biblioteca Municipal son outros dos quefaceres que non faltan tampouco este ano cando se achegan estas datas.
