O novo marco legal prantexado pola Consellaría de Medio Rural e aprobado nos pasdos días polo Consello da Xunta permitirá incrementar a produción e a calidade do viño de Galicia, segundo opinan dende o goberno autonómico. Para Núñez Feijóo este decreto “aporta seguridade xurídica, reduce as cargas administrativas e aposta por detectar parcelas que están infrautilizadas para poñelas en valor”. A normativa refunde nun único documento legal a multiplicidade de normas que ata o de agora regulaban o sector. Outro dos aspectos que salientan dende a Xunta é a simplificación dos trámites administrativos xa que os viticultores poderán realizar calquera trámite relacionado co sector (tanto para relacionarse coa Administración como coas denominacións de orixe) vía telemática a través da Oficina Agraria Virtual (OAV).
Zonas especiais como Ribeira Sacra e dereitos de plantación
Feijóo asegurou que esta normativa permitirá revitalizar a produción vitivinícola a través da creación da reserva autonómica de dereitos de plantación de viñedo. Actualmente hai un sistema de dereitos de plantación similar á das cotas lácteas, pero existe un amplo número de dereitos –máis de 1.000 hectáreas- que non están sendo utilizados. Os plans de Medio Rural pasan por elaborar unha “revisión pormenorizada” dos dereitos que están sen uso e crear unha bolsa para a súa distribución entre os viticultores que o soliciten. Por outra banda, nese protocolo de reparto priorizaranse determinados colectivos e tradicións. Segundo avanzou o presidente da Xunta, entre ditos colectivos prioritarios atoparanse os xóvenes agricultores e os agricultores profesionais, mentres que as zonas de especial protección serán “a viticultura de montaña e a de forte pendente”, unha medida que podería beneficiar á D.O. Ribeira Sacra polas súas singulares características.
