Os monfortinos “A velas vir”, gañadores da 1ª edición do certame “En marcha Música Xove” entre 14 grupos de rock lucenses
• O pasado 12 de xaneiro tivo lugar a entrega dos premios correspondentes ao 1º certame En Marcha Música Xove, organizado pola Vicepresidencia Primeira e Área de Cultura e Turismo da Deputación de Lugo. O primeiro premio foi para o grupo de rock de Monforte A Velas Vir, e que consiste na edición dun CD con nove dos seus temas, do que recibirán 1.000 copias que poderán distribuír segundo o desexen. Pola súa parte, os grupos Yuno de Viveiro, Stick-Up de Sarria e Miriam López Vila de Lugo foron os finalistas deste certame, premiados con outras 1.000 copias dun CD conxunto con temas dos tres grupos. O acto de entrega dos premios contou coa presencia do Vicepresidente Primeiro da Deputación de Lugo e responsable da Área de Benestar Social, Deporte e Mocidade, Antonio Veiga, do delegado de Cultura da Deputación, Mario Outeiro, e do responsábel da discográfica que gravou os CDs para os grupos gañadores, Eloi Caldeiro.
PROMOCIÓN DOS GRUPOS LOCAIS
Na súa intervención, Veiga e Outeiro destacaron que con este tipo de concursos búscase incentivar a creación musical entre a xuventude e ao mesmo tempo darlles a oportunidade, por unha banda, de gravar e ter un disco aos que resulten finalistas e, por outra, en tocar diante do público en escenarios profesionais para dar a coñecer as súas propostas. Na mesma liña, Antonio Veiga valorou moi positivamente o bo momento musical que atravesa a música nos grupos noveis dada a alta participación neste certame, malia quedar algúns sen poderse apuntar por ter os seus membros máis de 30 anos.
