Case 500 asociacións e clubes deportivos recibiron axudas da Área provincial de Deportes

•A subvención destinada a colectivos e concellos neste concepto foi de 500.000 euros en 2011 •Para actividades culturais, este departamento destinou 650.000 euros o pasado ano

• Os responsables das áreas de Deportes e Cultura da Deputación de Lugo, dependentes da Vicepresidencia Primeira, deron a coñecer o balance das axudas destinadas tanto a asociacións e clubes deportivos como a colectivos culturais e concellos para o desenvolvemento de actividades nos eidos da cultura e do deporte.

APOIO AO DEPORTE

Así, o delegado de Cultura e Turismo no organismo provincial, Mario Outeiro, informou de que a Área de Deportes destinou en 2011 un total de 500.000 euros a apoiar aos clubs e asociacións deportivas e aos concellos lucenses na organización de actividades culturais, grazas ao que se beneficiaron 495 clubs e asociacións deportivas, mentres que os concellos lucenses recibiron 109 axudas. En total, os concellos lucenses recibiron 170.000 euros para organizar actividades deportivas ou eventos deportivos e mellorar os seus locais e equipamentos deportivos, mentres que entre clubs e asociacións deportivas repartíronse 500.000 euros. Segundo explicou Mario Outeiro, para actividade deportiva de natureza competitiva destináronse 290.000 euros para 216 clubs, 110.000 euros para actividade deportiva non competitiva a 127 clubs e asociacións deportivas, e máis 100.000 euros para 152 asociacións e clubs destinados a organizar eventos deportivos.

balanceaxudascult — O delegado de Cultura e Turismo da Deputación de Lugo, Mario Outeiro, e Manuel Martínez, portavoz do grupo socialista na Deputación, durante a presentación do balance das subvencións destinadas para actividades culturais no 2011. GPVD.

AXUDAS A CONCELLOS

46 concellos lucenses, pola súa banda, recibiron 60.000 euros para pagar as súas actividades deportivas, como escolas deportivas e outras actividades. Asimesmo, recibiron 10.000 euros tamén para organizar eventos deportivos 9 concellos lucenses, outros 35 concellos recibiron 75.000 euros para realizar investimentos en infraestruturas deportivas e 19 concellos beneficiáronse de 25.000 euros para adquisición de investimentos deportivos.

APOIO Á CULTURA

Na súa intervención, Outeiro informou que a Área de Cultura destinou en 2011 un total de 650.000 euros a apoiar ao tecido cultural e aos concellos lucenses na organización de actividades culturais, grazas ao que se beneficiaron 520 colectivos e os concellos lucenses recibiron 112 axudas das diferentes liñas en concorrencia. En total, os concellos lucenses recibiron 190.000 euros para organizar actividades culturais e mellorar os seus locais e equipamentos culturais, mentres que entre as asociacións culturais repartíronse 460.000 euros. Finalmente, Outeiro criticou a actitude da Xunta de Galicia ao eliminar as axudas correspondentes ao 2011 e a parte do 2012 para cultura, e de unificar as destinadas ao deporte no bienio 2010-2011.