• A Comisión Executiva do Eixo Atlántico elixiu ó alcalde de Monforte de Lemos, Severino Rodríguez, novo vicepresidente da entidade transfronteiriza, un cargo que, como todos os da Comisión, ten carácter representativo e non está remunerado. É a primeira vez que unha cidade de tamaño medio e do interior de Galicia ostenta a vicepresidencia do Eixo Atlántico. A entidade agrupa 34 concellos galegos e do Norte de Portugal, entre os que se contan as catro capitais das provincias galegas, Vigo, Porto, Ferrol, Chaves, Braga e Santiago de Compostela.
“DESTACADO PAPEL DE MONFORTE” DENTRO DESTA AGRUPACIÓN
Segundo trasladaron dende o goberno local, “a decisión da Comisión Executiva vén a corroborar o destacado papel que xoga Monforte no Eixo Atlántico, unha agrupación de municipios que promove un posicionamento cohesionado nas decisións que afectan a Galicia e ó Norte de Portugal e que terá moito que dicir, entre outras, naquelas cuestións referentes á estruturación do ferrocarril en Galicia e no Portugal máis septentrional”. O novo presidente da entidade será o alcalde de Viana do Castelo, José María Costa, que toma o relevo de Abel Caballero, alcalde de Vigo. José María Costa destacou na loita contra a implantación das peaxes nas antigas vías SCUT de Portugal, sendo tamén defensor da conexión ferroviaria polo Miño entre Galicia e o Norte de Portugal. A Comisión Executiva do Eixo Atlántico acordou que a Asemblea Xeral da entidade se celebre en Viana do Castelo o próximo 16 de febreiro, no ano do vixésimo aniversario da creación do Eixo Atlántico, precisamente na mesma cidade. Dentro do Eixo Atlántico, a agrupación de municipios Galicia Interior da que forma parte Monforte xunto con Sarria e O Barco de Valdeorras publicou hai uns meses unha axenda estratéxica que aglutina un estudo feito por técnicos municipais e do propio Eixo xunto con axentes sociais. Noutros territorios como a eurocidade Chaves-Verín ou os que compoñen a asociación Galicia Central tamén se elaboraron estudos similares.
Cargando ...
