Atraer 2.000 visitantes en febreiro para activar a economía da provincia

A Área de Turismo da Deputación ultima os detalles para a creación da Empresa Pública de Turismo

A raíz da celebración da feira do turismo FITUR a mediados de xaneiro, a Área de Turismo da Deputación de Lugo, a través do delegado de Cultura e Turismo Mario Outeiro, expresou a súa aposta pola desestacionalización e pola creación de emprego mediante o reforzamento deste sector. Outeiro aproveitou a súa comparecencia para explicar que a ausencia de representación institucional da Deputación de Lugo en FITUR non significou que os produtos turísticos da provincia non estivesen en dito escaparate, senón que “non parece o máis razoábel dedicar fondos destinados á promoción e ao aumento do gasto turístico a sufragar o desprazamento e a hospedaxe de responsábeis políticos a Madrid”. Deste xeito, segundo explicou Mario Outeiro, o organismo provincial aposta por “priorizar en cuestións centrais e non accesorias” o investimento destinado ao eido turístico, xa que, segundo Outeiro, “o que temos que garantir é que Lugo chegue aos destinos turísticos, non que os políticos de Lugo se despracen aos destinos turísticos”.

As actuacións anunciadas pola Deputación de Lugo pretenden atraer visitantes á provincia ao longo de todo o ano. Arquivo EC.

EXPECTATIVAS DE VISITAS Á PROVINCIA

Nesta liña de actuacións, Mario Outeiro anunciou que o organismo provincial prevé máis de 2.000 visitas ao conxunto das terras lucenses para o mes de febreiro, en virtude do plan de desestacionalización do turismo que xa está en marcha “como medida de choque para o primeiro trimestre de 2012”. Este plan pretende “atraer visitantes nunha época do ano que habitualmente presenta uns pobres resultados turísticos, xa que a demanda é practicamente nula”, explicou Outeiro. Así, o plan “pretende garantir que as pernotacións e o gasto turístico se manteña nun período particularmente complicado. Este programa de desestacionalización incide en mobilizar as enerxías da demanda interna, como conseguimos co plan de termalismo, e tamén en atraer visitas do mercado estatal”, destacou o delegado de Cultura e Turismo.

EMPRESA PÚBLICA DE TURISMO

Durante a súa comparecencia, Mario Outeiro lembrou a aposta do equipo de goberno provincial “polo benestar e polo emprego” , porque “diante dunha situación como a actual o sector público non pode mirar para outro lado, senón que ten que traballar naquelo que é máis necesario”, argumentou. Nesta liña de traballo é onde se sitúa, según Outeiro, a creación da Empresa Pública de Turismo “como unha ferramenta para potenciar unha actividade económica que representa xa o 13% do noso PIB”. Os estatutos e obxectivos deste novo ente, do que Outeiro garantiu “o carácter fundamentalmente público da empresa que se cree”, e que contará coas principais asociacións vinculadas ao turismo, quedarán constituidos en breve. Deste xeito, esta empresa tratará de “actuar na demanda agregada para crear máis emprego, e de favorecer o crecemento económico do sector, aumentando o número de visitantes”.

Deixa unha resposta

Your email address will not be published.

Nova Anterior

Aposta pola mellora da calidade educativa

Seguinte Nova

Prescolar na Casa continúa coa súa laboura educativa no rural

Últimas noticias sobre ECONOMÍA

A %d blogueros les gusta esto: