Sober achégase ao seu pasado fidalgo

As xornadas abriron unha porta para seguir reconstruíndo a pegada da linaxe que deu vida ao Pazo de Sober e escribiu parte da historia de Galicia

Achegarse á familia nobre máis importante do municipio de Sober e, moi probablemente, a unha das máis importantes da zona foi obxectivo cumprido das primeiras Xornadas ‘A Casa dos López de Lemos e a nobreza galega’, celebradas a pasada fin de semana, precisamente na que fora a casa dos López de Lemos, o Palacio de Sober. Actualmente remozado en hotel de cinco estrelas gran luxo, o pazo foi residencia dos señores e señoras de Sober e Ferreira, unha linaxe pouco estudada deica o momento e da que “queda moito por descubrir”, tal e como indica o alcalde de Sober Luís Fernández Guitián, á fronte da principal institución promotora deste evento.

Na mesa inaugural estiveron presentes, de esquerda a dereita, Ramón Villares, presidente do Consello da Cultura Galega, Luis Fernández Guitián, alcalde de Sober e Isabel Aguirre, presidenta da Irmandade Ribeira Sacra. EC

UNHA HISTORIA AÍNDA POR DESCUBRIR

Varios historiadores e expertos revelaron aos asistentes diversos detalles da saga dos López de Lemos, do que don Lopo López de Lemos é o primeiro membro que aparece nomeado nos documentos consultados por Eduardo Pardo de Guevara, profesor de investigación no Centro Superior de Investigacións Científicas (IGPSEG- CSIC), e que datarían do ano 1.196. Os poñentes descubriron ademáis algúns datos dos emparentamentos da familia con outras da nobreza galega, coma os Amarante ou os Camaraza, para pasar a pertencer á linaxe de Medinaceli cando xa fora vendido o Pazo de Sober a xente externa á nobreza, xa a finais do século XIX, onde parece perderse un pouco o fío familiar. Os trece roeles do actual escudo de Sober e provintes do escudo de armas da casa, comúns ao de Pantón, os documentos vinculados a Santo Estevo, as parentelas con Portugal documentadas en diversos libros coma o do Conde don Pedro, ou os sepulcros nos mosteiros de Ferreira e Montederramo ofrecen pistas para compoñer a historia por descubrir dos López de Lemos.

O EDIFICIO CIVIL DE IMPORTANCIA MÁIS ANTIGO DE GALICIA

O alcalde de Sober traslada ademais o testemuño de veciños que lembran aos caseiros no Palacio nos anos 40 do século pasado, para quedaren entre os anos 50 e 60 completamente deshabitado o edificio civil de importancia máis antigo de Galicia, que algúns datan no século VI ou VII, e probablemente un dos de maior dimensión, con 4.000 metros cadrados de superficie construída.Agora remoldelado como hotel, o Palacio de Sober deixa constancia de distintas construccións que o compoñen e modificacións ao longo dos séculos. No legado dos Medinaceli, en Valladolid, consérvase un plano da construcción de finais dos anos 1.800, e que segundo o rexedor local pode ser consultado para futuras investigacións, aínda que xa existe unha copia que se conserva no Pazo de Oca.

UN PUNTO DE PARTIDA

A organización, a cargo do Concello de Sober e coa colaboración do Consello da Cultura Galega e a Irmandade da Ribeira Sacra, valorou dun xeito positivo as xornadas, “xa que conseguiu que grandes expertos e historiadores se implicaran e que se alimentara aínda máis unha inquedanza para seguir colaborando no descubremento dos López de Lemos”, comentou o rexedor local, que se amosou disposto a acadar finanzamento para unha futura publicación que dea soporte á historia dunha familia que daría nome ao municipio asentada no lugar de Refoxo, nunha casa que pasaría épocas de esplendor e decadencia e que aglutinaría máis ou menos parcelas de poder segundo o momento e parentelas, indo moito máis aló do máis coñecido e lexendario dunha linaxe remota, Diego López de Lemos, o Irmandiño. Para o Presidente do Consello da Cultura Galega, Ramón Villares, estas xornadas serven á vez para ensalzar o “perfil cultural e turístico do municipio” moi marcado pola existencia da nobreza, estamento de gran permeabilidade en coñecementos e que é “parte fundamental na construcción da propia Europa”.

Deixa unha resposta

Your email address will not be published.

Nova Anterior

Continúan as queixas sobre asistencia sanitaria en Monforte

Seguinte Nova

Abrindo portas para acceder ao mercado laboral

Últimas noticias sobre CULTURA

A %d blogueros les gusta esto: