Unha das manifestacións ancestrais máis singulares do carnaval en Galicia, o entroido ribeirao, pervive hoxe nas parroquias de Santiago de Arriba e Nogueira, en Chantada. Volantes, Mecos e Peliqueiros ou maragatos saíron xa por estas dúas aldeas nos domingos Lambedoiro e Corredoiro e preparan xa o domingo de Entroido.
PROMOCIÓN DENTRO E FÓRA DA NOSA COMUNIDADE
No caso dos de Santiago de Arriba continúan a levar a súa particular festa pagá alén das súas fronteiras, e este ano tocou viaxar a Potes, Cantabria, onde se deron a coñecer e entraron en contacto con outra manifestación patrimonial do carnaval que os veciños están a recuperar nesta localidade cántabra. A figura dos vistosos volantes propios das ribeiras chantadinas, a improvisación, a representación dos oficios e o afán de involucrar ao público acadando unha empatía cos espectadores foi o que máis chamou a atención dos anfitrións de Potes arredor do entroido ribeirao. José Carlos González, da Asociación do Entroido Ribeirao, destacou a experiencia da visita no obxectivo de espallar este entroido, que xa entrara en contacto con outros coma o de Salcedo os dous últimos anos. González, quen salienta que o entroido ribeirao é cada vez un pouco máis coñecido fóra da comarca, recoñece o traballo feito nos últimos anos, dende que o entroido escomezou a saír das aldeas de Santiago e Nogueira. “Hai moito que traballar aínda para que se chegue a valorar o que é realmente”, comenta, apuntando que o traballo feito pola asociación de Santiago vai na boa liña.
AXUDAS DAS ADMINISTRACIÓNS
A colaboración institucional valórase de distinta maneira segundo o lugar de onde proceda. A asociación Amigos do Entroido Ribeirao critica a falta de colaboración económica e promocional da Xunta, mentres que agradece o apoio da Deputación e o Concello de Chantada na medida das súas posibilidades, ao igual que a asociación Carnaval de Nogueira, que conta este ano cunha humilde dotación por parte do Concello de Chantada, ademáis do recaudado a través de rifas e sorteos. O arranxo e adquisición das “campanillas” e a reparación dos coloristas atuendos dos volantes alomenos cada dous anos son os principais investimentos no que se refire ao atrezzo, pero o maior capital no entroido ribeirao segue a ser o humano, sen o cal sí que non sería posible ter mantido esta tradición que escomezou a saír destas aldeas hai relativamente pouco tempo. A pesares de que hai un tempo que o entroido de Nogueira e Santiago non camiñan xa da man, estas datas seguen a ser moi especiais nas dúas localidades. Dende Nogueira, José Rodríguez, integrante do colectivo que promove este ano o entroido, destaca a importancia da xuntanza vecinal, que se materializa tamén nos xantares populares que son comúns a estas dúas localidades. O mesmo que a apertura aos visitantes e veciños da comarca que desexen participar. O Entroido Ribeirao nos seus inicios celebrábase en case todas as parroquias da ribeira chantadina: San Pedro de Líncora, Camporramiro, Santiago de Arriba, Sariña, Nogueira ou Vilauxe. Entre elas establecíase unha auténtica rivalidade para conseguir ser a parroquia que mellor os facía.
