Trala delimitación oficial do Camiño Francés, Repsol e Xacobeo firman un convenio para a plantación de árbores autóctonas en varios tramos deste trazado
A xerente da S.A. de Xestión do Plan Xacobeo, Camino Triguero Salas, o vicepresidente da fundación Repsol, César Gallo Erena e mais o director do Complexo Repsol Petróleo S.A. na Coruña, Luís Llamas Gómez asinaron no concello de Portomarín, na presenza do seu alcalde, Juan Carlos Serrano López, un convenio de colaboración para a plantación de árbores autóctonas nos Camiños Francés e Portugués. A continuación da firma, traballadores voluntarios desta empresa trasladáronse á zona sinalada e procederon á plantación, principalmente de loureiros, nun tramo duns tres quilómetros do Camiño Francés.
Este convenio inxírese dentro da estratexia de S.A. de Xestión do Plan Xacobeo de involucrar a empresas privadas na divulgación, conservación e mantemento dos Camiños de Santiago. Para elo, dende o ente xestor véñense celebrando dende marzo do pasado ano conversas coas empresas que patrocinaron o Xacobeo 2010. Despois deste acordo con Repsol, trabállase para que culminen as negociacións establecidas con diversas empresas para o patrocinio doutras actuacións, tales como, por exemplo, a mellora na sinalización.
O obxecto destas plantacións de árbores autóctonas é formar pantallas vexetais de xeito que palíen o impacto visual das estradas próximas aos Camiños, ao tempo que serven de protección aos peregrinos. Asimesmo, a Xunta de Galicia aprobou a delimitación oficial do Camiño Francés que establece o trazado da principal ruta xacobea e o seu ámbito de protección. Esta delimitación define un ámbito secundario de influencia merecedor dunha protección medioambiental adicional e a posta en valor da súa paisaxe. A aprobación da delimitación oficial posibilita iniciar a formulación do Plan Especial do Camiño Francés e a súa inscrición no Rexistro de Bens de Interese Cultural de Galicia.
