A sesión plenaria celebrada en Chantada neste mes de febreiro trouxo ao debate, que xa foi resumido na anterior edición deste periódico, outros asuntos coma a aprobación unánime do apoio á reivindicación do colexio Infanta Elena de Monforte, ao que acuden varios usuarios procedentes de Chantada. Pais e titores dos rapaces deste colexio de educación especial levan tempo reclamando a construcción dun centro que lle dea continuidade ao programa educativo ao que só teñen dereito os usuarios ata cumprir os 20 anos.
AUTOVÍA LUGO OURENSE
Os retrasos da autovía A-56 (Lugo-Ourense) que atravesa Chantada tamén chegaron á sesión plenaria, na que o alcalde, Manuel Varela, se comprometeu a reunir aos alcaldes dos concellos que atravesa o vial para que conxuntamente poidan instar á Xunta a axilizar o tramo Guntín-Ourense, que é o que afecta ao desenvolvemento da comarca de Chantada.
CONSORCIO TURÍSTICO
A través dunha consulta non formalizada aos restantes membros da corporación chantadina, o aínda representante chantadino no consorcio e edil do BNG Ildefonso Piñeiro, prantexou a dúbida sobre a rendibilidade de que Chantada continúe inmersa nesta entidade de promoción do turismo debido a un certo estancamento da súa actividade por mor das dificultades de finanzamento ao ter deixado de participar o Estado cando rematou o PDT. Piñeiro manifestou ademais o desacordo co finanzamento dunha obra importante no Concello de Sober por parte do Consorcio sen ter pasado primeiro pola consulta de todos os socios no pleno do Consorcio, tal e como se realiza habitualmente con cada obra para calqueira dos concellos. O rexedor local, Manuel Varela, manifestou que o Consorcio é a “única ferramenta existente da Ribeira Sacra como conxunto” e loubou a gran laboura que esta entidade fixo nos primeiros momentos “cando había finanzamento para investir”, apuntou, e engadiu que agora nótase “a falta de investimentos” por mor da ausencia daquel finanzamento doutras administracións. Ao mesmo tempo, recoñeceu que o propio concello de Chantada debe o abono de tres anualidades ao Consorcio. Por outro lado, o PSOE chantadino, na voz de José Manuel Ledo, manifestouse de acordo con valorar o custe que para o concello de Chantada ten a pertenza ao Consorcio en función da súa repercusión turística para o municipio.
ORZAMENTOS
En Chantada, coma en moitos municipios, a aprobación dos orzamentos para este ano chegará con retraso. Ante unha pregunta da oposición no pasado pleno sobre a preparación e aprobación dos orzamentos e dun posible plano de reaxuste debido á crise, o alcalde de Chantada anunciou que se agardaría alomenos deica o mes de marzo para a aprobación do documento económico. Os hipotéticos recortes anunciados nas transferencias de capital do Estado aos Concellos son un dos motivos que retrasarán a aprobación duns presupostos que se anuncian de reaxuste, e máxime tendo en conta a débeda acumulada neste municipio. Varela anunciou a necesidade de “aforrar neste presuposto e no que vén para liquidar a facturación que hai no Concello”. O rexedor local manifestou que actualmente o goberno local está “traballando con prórroga, pero adiantándonos ao orzamento real”. No que se refire ao préstamo do ICO de 270.000 euros, manifestou que “están pagadas as facturas correspondentes e agora resta amortizar o crédito”. O Concello de Chantada está comprometido a devolverlle ao ICO unha parte deste crédito neste ano, o préstamo no seu conxunto terá que ser devolto en tres anos. Esta cantidade fora solicitada para pagar facturas pendentes a proveedores.
Cargando ...
