Ildefonso Piñeiro Díaz, Xesús Mazaira Varela e Olga Otero Gómez, os ata agora concelleiros do BNG en Chantada, anunciaban esta semana a súa baixa como militantes desta formación política. Dende a saída do Encontro Irmandiño liderado por Xosé Manuel Beiras das siglas do Bloque nos pasados días, cabía a posibilidade de que concelleiros afíns a esta corrente, como Ildefonso Piñeiro, fixeran o propio nas respectivas formacións e corporacións locais. Sorprende dalgunha maneira a decisión do abandono conxunto en Chantada, xa que os outros dous edís, Xesús Mazaira e Olga Otero, son militante de Máis Galiza e independente, respectivamente. Pero o que non farán os concelleiros é abandonar as súas responsabilidades dentro da corporación e faráno a través dun grupo conxunto “traballando a prol de Chantada, aplicando o programa electoral co que nos presentamos ás eleccións municipais de xuño de 2011 respectando a decisión da cidadanía, que nos fixo concelleiros, e coa que temos un contrato que nos une durante o presente mandato”, explicaron. O que non está claro polo momento é en que forma oficial; “seguimos sendo nacionalistas e de esquerdas”, resalta Piñeiro, “non sei que nome se lle podería dar á sigla, xa nos puxemos en contacto coa secretaria do Concello que está a estudar as diversas fórmulas existentes, pero está claro que continuaremos a nosa tarefa dende a convicción de que somos un grupo nacionalista local”.
MOTIVACIÓNS
A unidade do grupo, o interese local e o dar cumprimento a un “programa feito en Chantada” parecen estar por enriba de movementos ou correntes de órganos superiores no caso chantadino. O que ata agora era o voceiro do BNG manifestou que estaban dispostos a agardar a decisión de Máis Galiza de abandonar ou non o BNG para agardar a decisión de Mazaira, “pero parece claro que o grupo preferiu permanecer unido”, manifesta Piñeiro, quen, pola súa parte, indicou os motivos polos que decidiu abandonar a formación nacionalista pola que se presentara ás eleccións. O desacordo co xeito de proceder do BNG nos últimos tempos ten a culpa xa que, segundo Piñeiro, “no Bloque sempre se tomaban as decisións por consenso, e non por maiorías como estaba a ocorrer ultimamente”, subliñou.
“TRABALLAR POR UNHA NOVA FORMACIÓN POLÍTICA”
En canto a un futuro máis lonxano e máis aló do estrictamente local, o que fora tenente de alcalde durante o pasado bipartito chantadino co Bloque Nacionalista Galego, manifestou o desexo de “traballar por unha formación política que naza da sociedade e que vaian por aí unhas liñas de actuación vinculadas fundamental a unha apertura á sociedade e a numerosas correntes que están a xurdir”.
